EFL-ah Premier League B team awm dawn lo

Premier League hnuaia league zawng zawng khaikhawmtu English Football League chairman Rick Parry chuan EFL-ah Premier League B team inelna awm tur anga sawi thawm awm chu thudik tawk lo a nih thu a sawi.

Parry hian Premier League leh EFL rights hralhna aṭanga 25% share chu EFL-in an chan theihna turin hma a la a, hemi atan hian EFL-a Premier League B team inelna siam chu a pawiti lo nia sawi a ni.

Mahse, Parry chuan, "A nihna dik taka sawi chuan ngaihtuah chiah pawh ka ngai lo. Ka ngaihdan chu eng pawh lo ni se, club-ten hei hi chu an duh ka ring lo," a ti.

Kum 2014 khan khatihlaia Football Association chairman Greg Dyke chuan Premier League B team te tana EFL huang chhunga league hran siam a lo rawt tawh a, mahse, a hlawhtling lo.

Parry chuan, "Greg Dyke khan a lo tum tawh a, a hnuah FA hotupa ṭhin tho Greg Clarke khan Project Big Picture-ah khan a lo telh tawh bawk a, mahse, tih chi a nih loh thu ka sawi," a ti a, EFL huanga Premier League B team telh tumna awm ṭhin chu EFL leh khawtlang inpawhna hriatthiam tawk loh vang a nih thu a sawi bawk.

EFL hotupa chuan, "Ruahmanna thar tam tak ka sawi fo a, mahse, B team chungchangah hi chuan ngaihdan pawmsa ka nei hmiah a ni. EFL chakna chu club zawng zawngten khawtlang nen inpawh taka hun an hmang hi a ni.

"Club-te hian an team an ngaihtuah tluk zetin an club innghahna khawtlang mipui an ngai pawimawh a, EFL hi B team rawn luh thut a, kan thil neihsa rawn tihdanglamna chi a ni lo," a ti.

Parry hian EFL-in television rights 25% an chan a duh bakah sawi hlawh tak Project Big Picture plan chu a thlawp a, heng zingah hian EFL Cup khelh ṭhin tih bo pawh a tel.

Project Big Picture-ah hian Premier League club 20 ni ṭhin, 18-a tihhniam te, team 18 aṭanga pahnih relegate a, 16-na Championship team nena playoff khelhtirte a tel a ni.

Parry chuan, "EFL Cup hi kalpui zel dawn ta ila, Europe-a inlan lote inkhelhna tur chauh nge ni ang a, EFL club chauhte inelna tura kalpui a nih ang? Thil tam tak ngaihtuah a ngai a, tunah ngaihtuah a hun tawh.

"Kum 2024-ah Champions League kalphung thar kalpui a ni dawn a, January 2024-a inhnial ai chuan tuna ngaihtuahna lo sen lawk hi a ṭul a ni," a ti.

April khan kum 2024 aṭanga Champions League tihdanglam chu rawt a lo ni tawh a, team 36 an inel tawh dawn.