SAFF Championship: Final lut tura chak mamawh India
India-in SAFF Championship-a final lut turin an match hnuhnung berah chak ngei ngei an mamawh a, an hmachhawn tur chu inelna thlengtu Maldives an ni.
India leh Maldives hi zanin dar 9:30-ah an inkhel dawn a, Blue Tigers tan chak ngei ngei a ngaih laiin Maldives tan erawh final lut turin draw result a tawk.
Vawiin tlai dar 4:30-ah Bangladesh leh Nepal an inkhel dawn bawk a, Nepal tan draw result a tawk laiin Bangladesh tan final lut turin chak ngei ngei a ngai bawk.
SAFF Championship-a team panga inel zinga tla chiang tawh awmchhun chu Sri Lanka an ni a, an puanthuah nen an kir tawh - match li aṭangin point khat chauh an nei a, an point hmuh hi India laka an hlawhchhuah a ni thung!
Apuia a zam lo
India-in an match hmasa pahnihah Bangladesh leh Sri Lanka an inhnehtawkpui hnuin an match hnuhnung berah Nepal an hneh hram a, Mizo tlangval Lalengmawia'n Nepal lakah a vawi khat nan bul ṭanin a team a chakpui.
Vaivakawn tlangval khelh dan enin zaninah pawh first XI a chang leh tura beisei a ni a, chiang taka sawi theih erawh a ni lo. Apuia chuan, "Ka vawi khat bul ṭannaah kan chak a, hmun chan ve leh phawt chu ka beisei," tiin Vanglaini a hrilh.
Maldives hi SAFF champion lai an ni a, mahni muala inkhel tur an nih bawk avangin a awlsam dawn lo. Mahse, Apuia chuan, "Ka huphurh hran lo. Awlsam taka chak tura indah chi a ni lo a, chutihrual chuan harsa tak turah pawh ka ngai chuang lo," tiin Vanglaini a hrilh a, Maldives a chung en lo.
Kum 2018 khan SAFF final-ah India leh Maldives hi an lo intawng tawh a, 2-1 in Maldives an chak. Tun hi India tan phuba lakna hun ṭha a ni.
Maldives an ṭha?
Mahni muala khel tur an nih avangin Maldives-in rin an hlawh zawk a nih pawhin a awm lo hran lo a, player enin India aiin chungnung bik lo mah se player langsar an neih nual avangin tawh erawh an khirh ang.
Maldives hian an match hmasa berah rin loh takin Nepal ngam lo mah se an match hnuhnung pahnihah Bangladesh leh Sri Lanka an hneh a, India hneh theih loh team pahnih hnehtu an nih avangin indah chungnung pawh ni se dem theih an ni lo.
Tlarhmaah kum 36 mi Ali Ashfaq a la ṭha reng a, ram tana match 85 leka goal 55 khung thei striker hi South Asia-ah chuan striker langsar pawl a nih avangin ven bik a sual lo ang.
Kum 33 mi Ali Fasir a la rintlak reng a, kum 26 mi Hamza Mohamed pawh player theihna nei sang a ni a, tlarhnung nghet lo India tan fimkhur a ṭul dawn.
India buaina
Igor Stimac-a'n Nepal laka hnehna an chan ṭumin an khingpui coach ngeng chhun khawpin chak a lawm a, heti taka Nepal laka chak lawm tur khawpin India an chhe lo - India coach-in inenfiah a mamawh.
India-in tun inelnaah goal khat chiah la chhuah mah se Bangladesh leh Nepal-in Blue Tigers tlarhnung an rum ṭhaih dan en chuan Stimac-a'n buaina a la chingfel lo tih a lang a, centre back-ah full back Subhasish Bose leh Rahul Bheke a rawn chhawr leh a nih chuan a tisual tawh ang.
Bangladesh, Sri Lanka leh Nepal-in an neih loh Ali Ashfaq, Maldives-in an nei tlat - ani hi a hlauhawm dawn. Chutihrual chuan India-in Sunil Chhetri an nei ve tho tih hriat a ṭha a, tun inelnaa Blue Tigers goal hnih chu Chhetri-a khung ve ve a ni.
India mamawh erawh Chhetri vanneih loh zan pawha goal khung thei a ni a, Manvir Singh-a'n India jersey hak a phu tih thiltih hmanga a lantir a hun tawh - zaninah India-in a thlir dawn e.