MFA-in season kal dan tur rel dawn

Mizoram Football Asso-ciation chuan nimin khan MFA Committee Hall-ah executive committee meeting an nei a, November 5, 2021-ah General Body Meeting an ko. He hunah hian District FA hruaitute nen football season hman meka kal zel dan tur an rel ang.

MFA General Body Meeting
MFA meeting chuan tun season hman mek (2021-2022) an thlir a, Covid-19 avangin inelna neih theih a nih loh bakah football hmasawnna kalpui hleitheih lohin a awm a, tun hnaiah sorkar inkaihhruaina (Standard Operating Procedure) thar berah entu awm loa inkhel kalpui phal a nih tak avangin MFA chuan season awm zel dan tur sawiho tur leh, thil tul dangte rel turin DFA-te nena inhmuh khawm hi a rawt ta a ni.

Meeting chuan Mizoram pum huapa thil thlir a, hri leng dinhmun en chunga thutlukna siam chauh turin a ti a, footballer-te hmakhua ngai chungin hripui leng ngaichang sia fimkhur taka kal dan tur rel hi ṭha a ti a ni.

Football Symposium
Mizoram Youth Commis-sion nen ṭangkawpa eizawnna tlaka football kalpui zelna tura inremna kawng pakhat - Mizoram Football Symposium neih hun atan November 5, 2021 ruat a ni a, District Football Association tin aṭangin mi pali zel koh khawm an ni ang.

He hunah hian Grassroots & Youth Development, Coach Education, Player Registration leh Referee Development lam hawi zirho a ni ang a; Mizoram football-in khelmual piah lama hma a sawn theihna tur lam hawi zawng ram pum huapa zirho a ni ang.

Coach Education
Mizoram Youth Commis-sion leh MFA ṭangkawpin Coach Education atana inremna an siam chu bawhzui a ni a, inremna angin kum 2021 chhungin coach education programme hi ṭum hnih buatsaih a ni ang. MFA Technical Committee bawhzui tura dah a ni.

Grassroots Football
Hripui avanga hun rei tak chhung khaihlak tawh MFA-in Grassroots football training a kalpui chu chawlh chhunzawm zel tura rel a ni a; sikul pawh kal ngam loh khawpa hri a len mek avangin naupangte koh khawm hi a la him loa ngaih a ni a, naupangte himna turin chawlh Grassroots Football hi chawlh rih a ni dawn.

State Team Training
Santosh Trophy leh National Senior Women's Championship lo awm tur atan Mizoram team ten training tluang takin an nei a, player leh coaching staff-te thawhhona pawh a ṭha. Santosh Trophy hi November-ah Northeast Zone Qualifier khelh tura ruahman a ni a, National Senior Women's Championship pawh hi November-a khelh tura ruahman a ni.

SAFF Congress Palai
South Asian Football Federation (SAFF) rorelna sang, SAFF Congress chu October 17, 2021 hian Maldives-ah neih a ni dawn a, he hunah hian All India Football Federation aiawha palai turin MFA honorary secretary Lalnghinglova Hmar an ruat.