World Cup khel turin Germany an tling

Germany-in Thawhṭanni zan khan North Macedonia 4-0 in an sawp a, Hansi Flick-a hote hi FIFA World Cup 2022 khel tura inpettling hmasa ber an ni.

Europe aṭanga World Cup khel tur zawnnaah Die Mannschaft hi group J-ah an awm a, inkhel dangah Romania-in Armenia 1-0 a an hneh avangin Germany umpha thei an awm tawh lo.

A keh sawm lo
Euro 2020-ah khan Joachim Low hoten Wembley Stadium-ah England 2-0 in an hneh lo a, Germany an tlu chhiaa ngaitu an ṭhahnem hle.

Low hnuaia Germany khelh dan thlir chuan thawhchhuah mai a harsa dawn niin a lang a, amaherawhchu hun rei lote chhungin coach thar Hansi Flick-a'n Europe ram ṭha zinga chhal theih turin a rawn din thar nghal.

Din tharna chu
Germany-in Low-a hnuaiah kum 2006-2014 chhung football hmuhnawm an khel a, an khingpuite na takin pressure an pe ṭhin. Hetih hunlai hi assistant coach-a Flick-a awm lai a ni a, Bayern manager hlui hian Germany kalphung hi a hrechiang sa hrim hrim.

World Cup nomawi an lak luh hnuah Germany an tla hniam a, Euro 2020-a England an hneh loh ṭum phei chuan ball a hlohin, lak let tumin pressure an pe tawh lo a, siamtharna an mamawh hle.

Flick-a thuneihna a chelh chinah erawh Bayern Munich player-te chu hmun pawimawh a chantir nghal a, chu aia pawimawh chu an khelh dan hmang a ni. Germany-in attacking football an khel a, goal venhim tuma tawlh let nghal loin an khingpuite lamah laklet tumin an bei nghal a, team dang daih an ni nghal.

Goal li leh phuba
Germany hian Low-a hnuaiah Euro 2020 hma khan North Macedonia hi qualifier-ah an hneh lo a, hemi avang hian Germany leh Low ring lotu an pung sawt.

Flick-a hnuiaah erawh North Macedonia muala an khel chungin inkhel an thunun a, first half-ah goal khung lo mah se an chance ngahzia thlirin hlauhthawnna tur a awm lo.

Second half-ah erawh Germany-in a khat mawi tawkin goal an khung. Minute 50-naah Kai Havertz-a'n goal hmahruai a khung a, Thomas Muller-a'n a siamsak.

Muller bawk hian minute 70-naah Timo Werner khung tur a siamsak a, Chelsea forward hian a khung ṭha hle. Werner hian minute 73-naah ṭha zetin Germany goal thumna a khung a, rawlthar duhawm Jamal Musiala-a'n minute 83-naah a khung. Kum 18 mi Musiala goal khung hi amah ang bawka hmabak nei êng kum 19 mi Karim Adeyemi siamsak a ni.

Match 5-ah match 5
Hansi Flick-a hnuaiah Germany-in match nga an khel a, an chak vek bakah goal 18 an khung a, goal khat chiah an chhuah.

Kum 56 mi Flick chuan, "First half bik kha chu Romania ang tho kha a ni a, goal hmaah kan hriam tawk lo. Goal khatna luh hnuah erawh sawisel tur a awm tawh lo. Ka nauten an hun ṭha neih an hmang ṭangkai. World Cup khel tura tlin kan duh a, tunah chuan kan tum kan ti hlawhtling ta," tiin an khelh danah a lungawi thu a sawi.

Germany hi World Cup-ah vawi li an champion tawh a, World Cup ṭan kum (1930) leh hrem vanga 1950 World Cup-a an khel lo tih loh chu an la khel vek a ni.