Champion tura rinkai Plisova a tla

Indian Wells Masters khelh laia hmeichhe champion tura rinkai Karolina Plisova chu a match hnihnaah a chak lo, seeded pakhatna hi player langsar tak ni lem lo Beatriz Haddad Maia lakah 6-3, 7-5 in a tlawm.

Brazil nula Haddad Maia hi vanneih vang chauha tournament khel phak a ni, qualifying-ah khan final round-ah a chak lo. Mahse, seeded 29-na Nadia Podoroska chu malpui hliam vangin a inhnukdawk a, a hmun ruakah a inlan theih phah.

World number 115 Haddad Maia tan tun ṭum hi WTA 1000 bika last 16 a thlen vawi khatna a ni. Nimin zing inkhelh laiin thli a thaw nasa a, set hnuhnung berah Pliskova hian a service la se la chuan 5-5 chiah a ni ang, mahse a hloh khut avangin a chak lo zawkah a ṭang.

Kum 25 mi Haddad Maia hian a match lehpekah chuan Anett Kontaveit a hmachhawn leh ang. Seeded 18-na Kontaveit hian inkhel dangah, rin loh tak maiin Bianca Andreescu chu 7-6 (5), 6-3 in a lo hneh ve thung a ni.

Andreescu hian 2019 khan Indian Wells-ah hian nomawi a chawi a, season hmasa khan hri leng vanga inelna a awm theih loh avangin nomawi kawltu a la ni mek, kuminah erawh beisei angin a khel chhuak thei lo.

Hnehna changtu Kontaveit chuan, "Hnehna chan hi chu engtik lai pawhin a nuam em em vek, a bik takin keimahni aia player ṭha leh rinkai zawk laka hnehna chan phei chu nuam tak a ni," a ti. Andrescu pawhin a khingpui chu hnehna chan phu zawk a nih thu a sawi ve bawk.

Inkhel dangah Paula Badosa chuan Coco Gauff 6-2, 6-2 a hnehin last 16 a inhlangkai ve bawk a, seeded 27-na Badosa tan Grand Slam dawta inelna sangah hian a thlen san ber ṭum a ni ve chiah bawk a ni.

Badosa chuan, "Gauff nen hian ṭhian ṭha tak kan ni, training pawh kan nei dun hnem hle. Season duhawm tak a hmang a, a kalkawng ti tawptu ka ni hi pawi ka tih rualin ka khelh ṭhat avangin ka lawm," tiin a sawi a, a ṭhiannu chu a thlah nghal bawk.

Player langsar ṭhenkhat an chak loh laiin Angelique Kerber erawh a chak. 2019 finalist hian a khingpui Daria Kasatkina chu 6-2, 1-6, 6-4 in a hneh a, world number 1 hlui hi tunah chuan champion tura rinkai berte zinga mi a ni tawh.