Amanda-in Magpies boss Bruce a hmu

Newcastle United neitu thar zinga mi Amanda Staveley chuan ban hmabak anga sawi Magpies coach Steve Bruce chu club training ground-ah a hmu a, ani bakah hian player-te pawh a hmu bawk.

PCP Capital Partners neitu Amanda hian Magpies-ah hian 10% share a nei a, ani bakah hian RB Sports & Media chuan 10% neiin Saudi Public Investment Fund chuan 80% share an nei ve bawk a, Amanda hi Newcastle an lei theihna tura hma latu ber a ni.

Kar hmasa Ningania pound maktaduai 305-a hralh tak Magpies hian Pathianni zan dar 9:00-ah hian neitu thar an neih hnua an league match hmasa berah Tottenham Hotspur an mikhual dawn a, club non-executive chairman thar Yasir Al-Rumayyan chuan inkhel hi a hmunah a en rin a ni.

Magpies hian league match sarih an khelh tawhah chak an la nei lo a, point thum nen team 20 inelna Premier League table-ah 19-na an ni mek. Hei vang hian coach Steve Bruce hi chhuak tura duhtu fans zingah an awm nual a, a chhuah ngei pawh a rinawm.

Kum 60 mi coach hian, "Newcastle manager nih chhunzawm zel ka duh a, mahse, thil hi a nihna ang taka thlir a ngai. Mi mawl ka ni bik lo a, club neitu thar nena thil thleng thei chu ka hre ve vek a ni," a ti a, coach nih chhunzawm a beisei lo.

Magpies coach thar tur hian Borussia Dortmund manager hlui Lucien Favre, Rangers coach Steven Gerrard leh Chelsea boss hlui Frank Lampard te hming lamrik a ni a, Bruce-a assistant Graeme Jones chu coach lailawk tura sawi rik a ni bawk.

Kum 51 mi Jones hian January 2021 khan Magpies hi assistant coach ni turin Bournemouth aṭangin a pan a, Newcastle fan a nihna hian a buk a tirit ang.