World Cup mascot tlangzarh

Nakkuma India-in a thlen tur, FIFA Under-17 Women’s World Cup official mascot chu nimin khan tlangzarhna neih a ni a, mascot hi Asiatic lioness (Asia sakeibaknei nu) a ni a, a hmingah 'Ibha' an ti.

Ibha hian vai ṭawnga 'Nari Shakti' (Hmeichhe thiltihtheihna) tih chu a entir a, thawhhona ṭha, tawrhchhelna leh inpekna nei a, midangte fuihphurtu ni tura hmeichhiate fuih chu a tum a ni, tiin an tarlang.

Mascot hming 'Ibha' tih hi Khasi ṭawng aṭanga lak a ni a, a awmzia chu "thil thlir thiam leh thudik ṭantu" tihna a ni - Ibha chuan India leh khawvel hmun hrang hranga hmeichhiate chu thutlukna dik siam a, an theihna sang ber thleng turin a duhsak a ni, tiin mascot chungchang hi sawifiah a ni.