Croatia-in point hlawh chhuak hram
FIFA World Cup European Qualifier-ah Croatia chu Slovakia nen 2-2 in an inhnehtawk a, player hriat hlawh Luka Modric awmna ram hian playoff khelh ngai loa tlin an duh a nih chuan an match hmabak pahnihah an chak a ngai dawn.
Group H inkhel dangah Russia chuan Slovenia 2-1 in an luh chhuah thung, point 19 hmuin group hmahruaitu an ni. Pahnihna Croatia leh Russia hi point hnihin an inthlau, qualifier-a an match hnuhnung berah ram pahnih hi an intawng ang - chumi hmain match khat ve ve an la nei.
Goal li a lut
Thawhṭanni zan Gradski vrt-a inkhelah Croatia lamin ball chang tamin inkhel an thunun zawk, mikhual lam goalkeeper Marek Rodak tan hna hautak an siamsak zauh zauh a, a pawimawh ber goal erawh an khung hleithei lo.
Minute 20-naah Slovakia winger Ivan Schranz chuan Marek Hamsik-a cross chu a khung. Mahse, Croatia-in chhanglet turin hun tam an mamawh bik lo - goal luh aṭanga minute nga hnu lekah Modric-a corner pet chu Andrej Kramaric chuan khungin si phurh a sut.
Chawlhlawk hmain mikhual team bawk an che fuh, defender ten hmun ruak an pek zeuh karah Lukas Haraslin chuan an goal hnihna a khung leh ta mai, Croatia lamin sut leh nghal tum mah se Kramaric a vannei nawn lo, woodwork a tih per.
Hun pawimawhah player ṭha bik danglamna a lang, minute 71-naah Modric a rawn inlan, vawi tam tak an ram lo chhandam tawhtu hian siphurh a sut zo a, hun tawp dawnah substitute Nikola Vlasic chuan chakna goal khungah inngai mah se Ivan Perisics a lo offside hman hlauh.
A uiawm
Anmahni mualah ngei team ṭha zawk ni chungin point thum an hlawh chhuak zo lo a, hun tawpa an goal khung an pawm loh avangin Perisic chuan pawi a ti hle.
Inter Milan winger chuan, "Result hi pawm thiam a harsa ka ti viau. Hnehna chan phu leh khel ṭha zawk kan ni a, amaherawhchu kan goal neih zat a inang miau si," tiin a sawi a, an goal thumna chu pawm ngei tur nia a ngaih thu a sawi ve bawk.
Croatia coach Zlatko Dalic chuan, "Kan match hnuhnung parukah goal kan chhuah lo, tun ṭumah erawh holam takin goal hnih kan chhuah ta si, goal kan chhuah bakah a khung theihna remchang kan hlah hnem hle.
"Engkim hi kan kuta innghat a la ni a, hmalam kan pan tur a ni. A hnuhnung bera Russia nen kan inkhelh tur hi a hautak dawn, chutih rualin keimahni mualah a ni dawn a, group hmahruaitu ni chunga qualifier kan khel theih ngei ka beisei," a ti.
Russia an chak
Hun chanve hma lama defender pahnih Zlatko Dalic leh Georgy Dzhikiya te goal khung hmangin Russia chuan Slovenia 2-1 in an hneh a, chawlhlawk hmain Slovenia lamin Josip Ilicic hmangin goal khat sut ṭhen mah se, second half-ah goal dang a lut tawh lo.
Russia hian an elpui Croatia an hmachhawn hmain Cyprus nen November 11 hian an inkhel hmasa dawn. Cyprus hi match riat khelh aṭanga point nga chauh la hmutu, table mawngphah luahtu an nih avangin Russia tan point thum hmuh belh beiseina a sang ang.
Group H aṭang hian Cyprus leh Malta tan beisei tur a awm tawh lo a, pathumna Slovakia leh an hnuaia mi Slovenia te pawhin point 10 chauh an la neih avangin playoff beisei thei an ni tawh bik lo bawk.
Russia leh Croatia te hian playoff khelh hah ngai loa World Cup ticket neitu zawk nih an tum dawn a, pahnihna ni zawk pawhin playoff an la khelh dawn avangin Qatar panna kawng a la inhawng dawn, a hautak tawh thung ang.