Netherlands an chak nuamsa

World Cup qualifier khelh mekah Netherlands an chet ṭhat chhunzawm zel a, Thawhṭanni zan khan an mikhual Gibraltar chu 6-0 ngawtin an sawp.

Netherlands tan Memphis Depay chuan goal hnih a khung a, Virgil van Dijk, Denzel Dumfries, Arnaut Danjuma leh Donyell Malen ten goal khat ṭheuh an khung bawk.

Group G-ah match riat an khelh aṭangin Netherlands hian point 19 an nei ta a, match hnih chiah khelh tur an neih tawh avangin an tan World Cup a hnai ta hle.

Chutihrual chuan an hnuai chiaha awm Norway hi ngaihthah an thiang bik lo. Norway hian Montenegro chu 2-0 in an hneh a, khelh zat inangah point hnih lekin Netherlands an phak lo.

Goal a sur
Latvia lakah goal tam tak khung tura beisei an nih laiin Netherlands-in 1-0 lekin hnehna an chang a, Gibraltar lakah erawh anmahni ṭantute an tibeidawng tawh lo chiang hle.

Dutch team hian minute kuana aṭangin goal an khung ṭan a, corner aṭanga ball kal chu Virgil van Dijk chuan a tauh lut - eng zat tak khung belh ang maw, tih chu zawhna a ni.

Minute 24-na a ni a, goal hmahruai assist tu Depay-a'n a khungtu dinhmun a luah ve ta thung a, an goal hnihna a chhuih lut - Davy Klaassen siamsak a ni.

Depay hian goal a khung hmain penalty a hlah a, first half hun pek belh minute thumnaah a pet nawn leh sak - a hlah nawn duh tawh lo a, chawlhlawk an hman chuan 3-0 in hma an hruai der tawh a, Depay-a'n kum 2021-ah ram tan goal 14 a khung tling ta bawk.

Gibraltar an zawr
Chawlhlawk hman a nih hnuah pawh Gibraltar an bet chhunzawm a, Netherlands khelmuala tho leh tura beisei chi an ni lo - first half ang thoin goal thum bawk an chhuah.

Netherlands tan Inter Milan full back Dumfries, Villarreal winger Danjuma leh Borussia Dortmund winger Malen ten goal khat ṭheuh an khung leh a, 6-0 in an chak.

Malen-a'n Dortmund a pan hnuah beisei phak rih lo mah se ram tan goal a khung avangin inrintawkna a nei thar leh ang tih a chiang a, kum 24 mi Danjuma-a'n ram tan match thuma goal hnih a khungna a ni a, Villarreal tan tun season-ah match riat khelin goal nga a khung a, assist vawi khat a nei tawh bawk.

83% zet ball chang chunga vawi 32 shot nei Netherlands hian October 2001 hnua a vawi khat nan an mualah a zawnin match thum chu goal thum emaw a aia tam zawk an khung ta.

Norway an chak
International break-ah hliam vangin Erling Braut Haaland a feh chhuak thei lo a, Norway-in an thiampuipa tel loin match hmasa zawkah Turkey chu 1-1 in an inhnehtawkpui a, an elpui Netherlands-in point hnihin an tlansan phah.

Thawhṭanni zanah erawh an elpui team thlahfal bik zel hi Norway team-in an duh tawh bik lo a, an mikhual Montenegro chu 2-0 a hnehin beiseina an la insiam ve zel.

Norway tan Mohamed Elyounoussi chuan goal hnih a khung a, hun pek belha Montenegro wing-back Marko Vesovic hnawhchhuah a nih hnuah Southampton forward Elyounoussi hian a goal hnihna hi a khung chauh avangin 'an chak hram' tia sawi theih an ni.

Hriat reng tur erawh November international break-ah Norway hi Netherlands nen an la intawng leh dawn a, group khat aṭangin automatic-a World Cup tling tur pakhat chauh an awm dawn avangin 'final' ti pawhin thlirlawk a sual lo.