Muaythai Virtual Championship lawmman sem

Muaythai Association of Mizoram chuan, Ramhlun Indoor Stadium-ah Mizoram State Virtual Muaythai Championship neih zawh taka medal leh certificate semna hun an hmang. Team champion Dawrpui Club hnenah trophy hlan a ni.

July 29 aṭanga August 6 chhungin Mizoram pum huap Muaythai Virtual champion ṭum hnihna neih a ni a, nikum khan Inter District championship neih ni tawhin kuminah State championship-a chhunzawm a ni bawk.

Hripui leng avanga inkhuahkhirhna dan sorkarin a siam avangin medal semna hun hi hman theih a ni lawk lo, inkhuahkhirna dan hawn zau a nih tak avangin medal semna hun an buatsaih thei ta a ni.

Championship-ah hian a pumpuiah Dawrpui Muaythai Club chuan gold medal pariat, silver medal panga leh bronze medal pakhat - a vaiin medal 14 an dawng a, pahnihna Ṭhuampui Muaythai Club chuan gold medal pali leh silver medal pathum, a vaiin medal 7 an dawng.