Australian Open khel turin vaccine lak a ngai

Australia sorkar chuan thupek khauh tak a ti chhuak. An ram chhunga tennis inelna lian ber Australian Open khel tur tan chuan Covid-19 laka invenna (vaccine) lak ngei a ngai dawn - ngaihhnathiamna a awm loh chuan player ṭhenkhat an buai ngei ang.

Melbourne Park awmna Victoria state sports minister Martin Pakula chuan, "Tennis player ni ila chuan invenna hi ka la ngei ang. Australian Open khel tur chuan loh theih loha zawm ngai a awm dawn, chung zinga pakhat chu invenna lak a ni dawn," tiin a sawi.

Tennis season khat chhunga major tournament hmasa ber Australian Open hi Janaury thla a khelh ṭhin a ni, inelna buatsaihtu Tennis Australia chuan thu chhuah an la siam lo - sorkar nen indawrna a la awm leh dawn a, ruahmanna thar a la chhuak mai thei bawk.

October thla tawp hian Victoria sorkar chuan inkhuahkhirhna ṭhenkhat chu a thlah dul dawn, tun thla tawpah chuan an state chhunga cheng puitling zinga 70% chuan vaccine an la hman tura ngaih a ni.

Hripui leng vangin Australian Open hi kuminah khan a khelh hun an sawn hla tawh a, a hmuna entu an awm mumal thei lo bawk. Nakkumah erawh a hun pangngaiah khelh theih beisei a ni a, entu pawh an awm thei tawh ang.