J League-ah relegation awm dawn lo

Japan rama football inelna sang ber J League-ah relegation a awm loh tur thu nimin khan an puang. Inelna hi match khat chauh an ṭan tihin coronavirus vangin an khel thei lo zui a, February 23 aṭangin inkhel a awm tawh lo. 

Coronavirus avang hian kumina khelh tur European Championship chu 2021-a khelh turin sawn a ni tawh a, Tokyo Olympic erawh July 24-ah ṭan tum a la ni. J League thuchhuahah hian inelna 75% zawh hman a nih chuan J2 leh J3 aṭanga ti ṭha pahnih chu league sang zawkah an kai chho dawn. 

J League-ah hian team 18 an awm a, ruahman dan chuan December 5-a khelh zawh tur a ni a. Tunah erawh Covid-19 vangin ruahman dan angin a kal thei tawh dawn lo a, 2021 season-ah hian team 20 an awm chuan relegate tur team li an awm dawn tihna a ni ang. March 25 hian J League ṭan leh hun tur tihchian a ni dawn a, tuna ruahman dan chuan April 3-a ṭan tur a ni a, amaherawhchu Covid-19 dinhmun thlir chuan an duh hunah hian an ṭan theih a beiseiawm loh.