Hmalam panin Medvedev a kal zel

US Open champion Daniil Medvedev chuan a khelh ṭhat a chhawm nung zel a, tun season chhungin match 50 a chak tling ta. Russian star hian Filip Krajinovic chu 6-2, 7-6 (7/1) a hnehin Indian Wells Masters-ah last 16 a inhlangkai.

Nimin inkhel hi hun rei vak lo chhung chu ruahin a tibuai deuh a, mahse buaina nasa erawh a thleng lo thli a thawt nasat bawk avangin player ṭha tan pawha chetsual theihna a ni, amaherawhchu Medvedev a talbuai duh lo.

Kum 25 mi Medvedev chuan, "Boruak danglam tak hnuaia hnehna chan hi chu a lawmawm bik, set hnih chauh khel ni mah ila thahrui a heh a, vanneih a ngai tel bawk," tiin a sawi a, awlsam taka chak a ni lo tih a pha lo.

A hmathlir sawi zuiin Medvedev chuan, "Kum ruk mi chauh ka nih lai khan world number 1 nih hi ka lo chak tawh thin, tun thlengin ka tum pawh a ni, mahse tun dinhmunah chuan Novak Djokovic hi tluk rual loh a ni," a ti.

US Open final-ah khan player ṭha pahnih hi an intawng a, rinkai zawk Djokovic a chak lo. Serbian star-in Grand Slam nomawi pali a kawl khawm vek a tumna chu Medvedev-a'n a lo tih tawpsak.

World number 2 Medvedev hian a match lehpekah chuan Grigor Dimitrov a hmachhawn leh dawn. Bulgaria tlangval hian a khingpui Reilly Opelka chu 6-3, 6-4 in a lo hneh ve bawk a ni.

Inkhel dangah Argentina tlangval Diego Schwartzman chuan Daniel Evans chu 5-7, 6-4, 6-0 in a hneh a, Casper Ruud pawhin a khingpui Lloyd Harris nen hun rei tak an inbeih hnuah 6-7 (4/7), 6-4, 6-4 in hnehna a chang ve bawk.