Hmabak match khat Liverpool leh Chelsea hma hun innghahna

Premier League-ah match khat chiah khelh tur a awm tawh a, Pathianni zan dar 7:30 hian Liverpool leh Chelsea an inlan ve ve dawn.

Liverpool-in Brighton & Hove Albion an mikhual dawn a, Chelsea-in Newcastle United an lenchilh thung ang–team pahnih hmaa inchhawp chu Champions League a ni.

Manchester City, United leh Tottenham Hotspur chu Champions League khel tura tling chiang tawh an ni a, Premier League-in hmun ruak pakhat an la nei–Liverpool leh Chelsea ten an inchuh ang.

Liverpool chu dinhmun ṭha zawk an ni a, Jurgen Klopp-a naute tan a sang pali zinga season khar turin point khat hlawhchhuah a tawk. Chelsea-in hnehna an chan ngei a ṭul a, Anfield-ah Liverpool an tlawm a ṭul tel bawk.

Inkhel pawimawh
April 14 zana Liverpool-in 4-0 a Bournemouth an hneh khan Champions League khel turin buaina an nei tawh loa ngaih a ni. Mahse, Klopp-a naute hian West Brom leh Stoke City an inhnehtawkpui zui a, inkhel pawimawhah Chelsea chu 1-0 a an ngam loh zui bawk avangin dinhmun derthawngah an awm phah.

Jurgen Klopp chuan, "Champions League khel turin kan dinhmun a la chiang lo a, Brighton nena kan inkhel tur hi tun season-a kan match pawimawh ber a ni.

"Season ṭantir aṭangin uluk takin kan kalphung tur kan duang a, tun dinhmun hi kan thleng. Match khat chakin Champions League min hruai thleng dawn a, chu chu thil duhawm tak a ni. Mahse, hnathawh turin min la hmuak tih hi kan theihnghilh a thiang lo a, theihtawp kan chhuah dawn a ni.

"Tun hi Champions League final ngaihtuah hun pawh a la ni lo a, kan hmaa awm chu Brighton an ni a, anni hi ngaihthah an thiang lo," a ti a, Pathianni zan an inkhel turah chauh an rilru pe turin player-te a duh.

Salah a inringtawk
Ningani zan khan Liverpool chuan club award an sem a, Mohamed Salah chuan Players’ player of the season leh Player of the season chawimawina a hum haw a, season thara Champions League khel tura an inrintawk thu a sawi nghal.

Liverpool tan tun season-a match 50-a inlana goal 43 khungtu forward chuan, "Season tharah Champions League kan khel dawn tihah hian kan chiang. Europe-a inlan tura kan dinhmun chinfel phawt hi kan duh a, chumi hnuah Champions League nomawi chawi tura Real Madrid hneh hi kan duh chu a ni," tiin a sawi.

Salah-a'n season duhawm tak a hman avangin Liverpool chhuahsan tur anga sawi thawm a awm a, mah se Egyptian forward hian Anfield-ah a zinkawng a ṭan ve chauh thu a sawi. Salah chuan, "Liverpool-ah hian ka hlim a, nuam ka ti takzet.

"Liverpool nen hian hmachhawp tam tak ka nei a, in hriat vek angin season duhawm tak kan hmang mek a, Champions League final hial kan thlen avangin kan hlim em em. Tun hi a bul ṭanna chauh a la ni," a ti a, Merseyside club-ah hlawhtlinna tam zawk chhar a inbeisei.

Chelsea an buai!
Season hmasaah kha chuan Chelsea chu Premier League champion an ni a, tun season-ah erawh Champions League khel lo thei dinhmunah an ding mek–Antonio Conte-a'n a season hmasa bera fak a hlawh tluk zetin tun season-ah sawisel a hlawh.

Italian manager hian rin loh takin player a thlak kual fo a, Liverpool an hneh hnuah khan an hmabak match hniha chak ve ve bakah Liverpool chak zawh loh an chan tel a ṭul a, beiseina an nei–mah se Huddersfield nena an inkhelah Conte-a'n thutlukna mak tak a siam a, khel ṭha tluang tak Olivier Giroud leh Eden Hazard-te bench-ah a dah.

Huddersfield-in Chelsea chelhin 1-1 in an inhnehtawk a, Conte-a'n chhilh rawn a hlawh zui. Italian manager erawh a thutluknaah nghet takin a ding a, amah sawiseltute a chhanglet. Juventus boss hlui chuan, "Player thlak kual vanga chak zo loa min ngai a nih chuan ngaihdan atthlak tak a ni.

"Chelsea kan ni a, squad chhah tak kan nei. Burnley lakah pawh khan squad ka thlak danglam nasa a, hnehna kan chan avangin inthlak kual kha ṭhaah kan ngai. Liverpool lakah kan tha kan seng nasa a, khata kan squad pawh kha sawisel a ni tho a, mah se hnehna kan chang. Hei hi football chu a ni," a ti a, Huddersfield laka point an hloh chu chu vanduai vang a nih thu a sawi.

Conte dinhmun
Khawthlang media ten Conte dinhmun tur an inrinsiak mek a, a duhthawh zual chuan season thara Italian manager thlaktu tur thlengin an thai lang leh tawh!

Chelsea hian an match tawp berah Newcastle United hi an hneh a, FA Cup nomawi an chawi bawk a nih chuan Conte-a'n 'chance' a la neiah ngaih a ni. Mahse, Magpies hneh lo chungin Champions League an khel lo a nih phawt chuan FA Cup meuh pawhin Conte hi a chhanhim zo kher lo ang.

A mawhphurhna aṭangin Conte erawh tlanbo a tum lo. Liverpool an hneh hnu lawka phur taka, "Champions League khel tura kan beiseina chu a nung thar ve leh ta," titu hian Huddersfield nena an inhnehtawk hnuah, "Panganaah kan awm a nih chuan chu chu kan phu tawk a ni mai," tiin a sawi a, a dinhmun him lo a ngaihven lo.

Conte hian, "Ka hmalam hun ai chuan top four-ah season kan khar dawn em tih hi ka ngaih pawimawh zawk chu a ni," tiin a lo sawi tawh a, zaninah Magpies laka chak tumin an khel ang.