Arsenal manager zinga ropui Arsene Wenger hun hnuhnung ber

"Mi hriat hlawh lo tak ni chungin he hmunah hian ka rawn kal a, English ka thiam loin mi ten mak min ti a, min hriatchian kha an chak thei hle," tiin Arsenal manager Arsene Wenger chuan London Colney-a press conference hnuhnung ber a neihin a hun hmasa chanchin a sawi a, Pathianni zan dar 7:30 hian Gunners manager a nih chhunga a match hnuhnung ber ni turin Huddersfield Town a hmachhawn ang.

French manager Wenger hian 1 October 1996 aṭangin Arsenal a enkawl ṭan a, thu thar lakhawmtute a hmachhaawn hmasak ber ṭum chuan, "English football ka ngainat vangin he hmunah hian ka rawn kal a, football bulṭhut chu he hmunah hian a awm a ni. Arsenal kalphung leh theihna sang tak hi ka ngaina," tiin a sawi.

North London-ah kum 22 hna a thawh hnuin season tawp rualin Wenger-a'n hna a kalsan tawh dawn a, Premier League manager ṭanglai zinga hna ngai chelh rei ber chuan, "Khawvel a danglam tawh a, football-ah sum pawh a tam tawh hle. Chuti chung chuan he club hlutna leh a kalphung pangngai chu ka theihtawpin ka vawng nung a, a pumpui khaikhawm nan chuan ka ti ṭha thawkhatin ka hria," tiin a hnathawhah a lawm tawk thu a sawi.

Team dinhmun
Arsene Wenger-a'n a enkawl chinah Arsenal-in Champions League an khel char char ṭhin a, season hmasa khan Premier League-ah pangana an nih vangin kuminah an khel lo, tun season-ah pawh parukna an nih chian tawh avangin season tharah Europa League an khel leh dawn.

Emirates Stadium leh Old Trafford-ah te Wenger thlahna hun ropui takin hman a ni tawh a, a chawlh tur thu a puan hnua a match tinah duhsak a hlawhin player ten an manager tan an theihtawp an chhuah ṭhin; zan-inah pawh tun hnaia khualmuala result chhe tak an neih zawn mek chu thaibo tumin thapui an thawh ngei ang.

Kai thar Huddersfield Town pawhin an match hnuhnung berah season hmasa champion Chelsea khelmualah point khat an hlawh chhuak thei a, league match 37 khelhah point 37 hmuin season tharah EPL an khelh chhunzawm dawn tih a chiang tawh. An khelmuala inlan tur an ni a, Wenger-a hun hnuhnung ni mah se tlawm ngawt an duh bik dawn lo.

Zing dar 8:45-ah chuan
Arsene Wenger-a'n a tlangpui thuin chhun leh chawhnu lamah press conference a nei ṭhin a, a hun hnuhnungah erawh a tih ṭhan loh dan takin an rama Ningani zing dar 8:45 khan a nei daih! Wenger chuan, "Chanchinbu mite hian dar 10:00 emaw 11:00 bawr velah hna an ṭan ṭhin a, tun ṭum chu tlema in insan mar deuh a ngai ve a ni, hma taka tih hian in rawn kal vek lo ang a, a awlsam phah ang," tiin thuthar lakhawmtute hmaah bul a ṭan chho.

Football khawvelah sumdawng hausa an zuang lut nasa a, manager tam tak chu an hna a nghet lo thei hle. Premier League club zingah manager thlak fo pawh hi thil thar a ni lo - Claudio Ranieri leh Jose Mourinho te chu league champion an nih hnu season-ah ban an ni a, season hmasa champion Antonio Conte dinhmun a chiang lo mek bawk.

Kum 68 mi Wenger chuan, "Sir Alex Ferguson ka hre reng a, a dam chho zel niin ka hria a, ka lawmpui hle. Ani khan kum 26 zet a hna ngai a thawk a, kei chu kum 22 a ni thung. Tunah hian manager naupang tak tak kum ruk vel hna ngai thawk tawhte an awm a, kum 22 chhung an ṭang zui thei ang em tih chu ka hre lo, chutihrualin kan record ang hi chu a la thleng leh thei," tiin manager pakhatin club ngai hun rei tak chhung an la enkawl theih a beisei thu a sawi.

Danglamna chu
Japanese J League club Nagoya Grampus Eight aṭanga Arsenal zawmtu Wenger hian Arsenal kalphung tam tak a thlak danglam a, training kalphung a thlak leh ei leh in a thakte chu langsar leh chhawr tlak an ni. England-a khelmual vantlang pakhat Highbury aṭanga khawvel stadium changkang berte zinga mi Emirates Stadium an sak thlengin a sulsutu pawimawh a ni.

Premier League vawi thum champion Wenger chuan, "Arsenal ka zawm tirh kha chuan hnathawk mi 80 kan awm a, tunah chuan 700 kan tling tawh a, sum dinhmun pawh a ṭha tawk a ni. Ka rawn kal tirh kha chuan English football hi a la inkharkhip hle a, tunah chuan ram hrang hrang aṭangin neitu an awm tawh, inelna pawh khawvel huap a ni," tiin Premier League a ṭhan thu a sawi.

Player langsar leh manto aia chher hriam theih tur lei ṭhintu Wenger hian 2003-04 season khan tlawm miah loin league nomawi a chawi a, "The Invincibles" tia an sawi zui hi a team din tawh zinga ṭha berah a ngai. Wenger chuan, "Premier League-ah thil la thleng ngai lo a ni a, an sulhnu vang khan a ṭha ber an ni ang," a ti. A hun hmasa lam 1998 bawr chhoa a team chu a beisei aia ṭha an nih thu a sawi bawk.

Engtin zel nge ni ang...
Arsenal manager ropui bera ngaih Arsene Wenger-a'n a hma hun a sawi chiang duh rih lo a, chutihrualin a beisei aia tam hna thawh tur a hmuh thu a sawi - French manger hian Ningani thlenga a tih tur bak a sawi duh lo.

An ramah a kir phawt tur thu sawiin Wenger chuan, "Thawhṭanni leh Thawhlehni hian France-ah tih tur ka neih avangin ka kal ang. Chumi hnuah ka rawn kir leh ang a, Ninganiah ka office ka chingfel ang - a hnu lam chu ka hre tawh bik lo," tiin a sawi.

Wenger-a'n Arsenal enkawl dawn tawh lo mah se hna a la chawlhsan dawn lo, European club lian ṭhenkhatin an club enkawl turin an duh tih chu hriat sa a ni. Chutihrualin ram team nge club a enkawl zui dawn tih erawh hriat a la ni lo - chawlh a hmang phawt dawn tih erawh a chiang thung.

Zawhna chhangin Wenger chuan, "World Cup ka en dawn, a match hmasa ber aṭangin ka en ang. Premier League pawh ka la en zui dawn, zing karah zana thil thleng ngaihvenin ka mit leh beng ka la chhi reng dawn a ni, ka danglam lo ang," a ti.