Guardiola-a'n point 100 a duh

Manchester City manager Pep Guardiola chuan point 100 nena season khar a duh. Premier League champion hian Pathianni zan dar 7:30 hian tun season-a an match hnuhnung berah Southampton an hmachhawn ang.

Guardiola chuan, "Kan season duhthusam ni pha teuh tak hi point 100 nena khar kan duh. Point 97 kan hmu tawh a, goal ṭhahnem tak kan khung a, hei hi tun season-a kan hnathawh chu a ni," tiin chhuang takin a sawi a, amaherawhchu Champions League nomawi an chawi theih loh avangin an tum ram tak an thleng pha lo.

Spanish manager chuan, "English football-ah bung thar ziah kan tum a. Liverpool-in 80s chho English football an thunun te leh Manchester United-in 90s chhoa an thunun te elpha tur chuan nomawi tam zawk chawi a la ngai. City-in Premier League-ah kum ruk chhungin nomawi vawi thum an chawi a, kumina champion kan ni a. Statistics leh thlirna hrang hrangah tun season bikah chuan a ṭha ber kan ni," tiin hmachhawp leh an thlen chin a sawi.

City hian Pathianni zana Saints an hneh thei a nih chuan Premier League history-a point 100 hmu sang ber an ni ang.