Pahnihna United, Carrick-a hun hnuhnung

Manchester United chu Ningani zan khan West Ham nen London Stadium-ah goal awm loin an inhnehtawk a, match khat khelh hmabak la awmah point 78 hmuin pahnihna an nemnghet.

United hian Pathianni zan dar 7:30 hian Watford nen Old Trafford-ah tun season Premier League-a an match hnuhnung ber an khel dawn a, midfielder Michael Carrick thlahna hun an hmang ang.

Goal tel lohna
Season tawp inkhel tam zawk ang thoin inkhelah thathona a awm lo a, hun tawp hma hreta Hammers midfielder Mark Noble leh United midfielder Paul Pogba te intibuai chu boruak a nun lai ber a tih theih.

Referee Jon Moss chuan player pahnih hi yellow card pe ve vein red card a phawrh lo a, manager pahnih pawh referee thutlukna an lungawi. Hammers manager David Moyes chuan, "Sawi zui tlak a ni lo a, referee khan a ṭhelh dai thiam hle," tiin a sawi.

United boss Jose Mourinho pawhin, "Paul leh Noble te kha ka thlir zui a, inkhelh banah kawr an inthleng a. Inelna ṭha tak khelmual chhungah an lantir a ni," tiin a sawi.

Portuguese manager hian Brigton & Hove Albion hneh lotute aṭangin player pariat ngawt a thlak a; attacking khel thiam aia defending ṭha player a chhawr tam avangin goal a lut lo hi a mak hran lo.

Mourinho chuan, "A sang pali zinga awm phak hi a pawimawh a, palina nih ai chuan pahnihna nih chu a ṭha zawk. Pahnihna nih hi kan lawm ngai lo, chutihrualin City an che ṭhat avangin champion kan beisei ngam lohna a rei tawh a, hemi hnua kan tum pahnihna kan nih theih kan vangin hlim," tiin an thlen chinah an lungawi thu a sawi.

De Gea - Golden Glove
London Stadium-ah David de Gea-a'n goal a chhuah lo a, Spanish keeper hian league-ah vawi 18 clean sheet a neihna chiah a ni a, amah hnaih bertu Manchester City keeper Ederson aia vawi hniha a neih tam avangin a vawi khat nan Premier League Golden Glove a dawng dawn.

United keeper De Gea chuan, "Ka vawi khatna tur a ni a, a nawm dan a dang bik," tiin a lawm thu a sawi a, Spanish keeper hian tun thlatir khan Sir Matt Busby Player of the Year chu a vawi li nan a dawng a, record thar a siam.

Portuguese manager Mourinho pawhin De Gea a lawmpui thu a sawi rualin team thawhrah a nih thu a sawi lang bawk.

A tawp nan
Kum 36 mi Michael Carrick chuan tun season tawp rualin football khelh a chawlhsan dawn a, Pathianni zan hi Old Trafford-a a inlan hnuhnun ber tur a ni a, Mourinho pawhin captain armband nen inkhel bul a ṭan tur thu a sawi lang tawh.

Sir Alex Ferguson chuan kum 2006 khan captain Roy Keane thlak nan Carrick chu Tottenham aṭangin pound maktaduai 18-in a lalut a. United hi Premier League-ah vawi nga a champion pui a, Champions League, Europa League, FIFA Club World Cup leh FA Cup-ah vawi khat ṭheuh champion puiin League Cup nomawi vawi thum a chawi bawk.

English midfielder langsar Paul Scholes, Frank Lampard leh Steven Gerrard te hun a liam a, Carrick a hun thleng ve leh ta.

Engtin zel?
Watford an hmachhawn hunah Romelu Lukaku a dam hman a rinawm lo a, Mourinho chuan Anthony Martial leh Marcus Rashford ten bul an ṭan tur thu a sawi chiang tawh.

Belgian striker Lukaku hi FA Cup final-a Chelsea an hmachhawn hunah chuan a dam hman beisei a ni. Keeper David de Gea-a'n Golden Glove a dawn chian takah chuan United league match hnuhnung berah Sergio Romero a rawn inlan thung ang.