USA-ah Rooney a pem dawn
Everton striker Wayne Rooney chuan season thara MLS club DC United zawm turin a thuphungin American club hi inremna a neihpui tawh a, ruahman anga engkim a kaltluang a nih chuan Rooney man zat hi pound maktaduai 12.5 a ni ang.
Rooney aiawhte chu US-ah English striker chungchang ngaihtuah turin an thang mek a, Manchester United legend hian season tawpa Everton chhuahsan a pawiti tawh lo. Hetihrual hian Rooney nena inhmuthiam lo Everton boss Sam Allardyce dinhmun a chiang bik lo a, Big Sam hi a chhuak a nih chuan Goodison Park-ah Rooney a cham chhunzawm mai thei.
Kum 18 mi lek nia Everton a chhuahsan hnuah Rooney hian Old Trafford-ah season 13 ngawt hun a hmang a, Premier League nomawi panga leh Champions League chawipuia United tana goal (253 goals) khung hnem ber record a siam hnuah season ṭan dawn khan Everton-ah hian a kir.
Rooney hian tun season-ah Everton tan inelna hrang hrangah match 40 khelin goal 11 a khung a, assist vawi thum neiin tun season-a club top scorer a ni mek. Mahse, coach thar Big Sam hnuaiah midfield role pek a ni a, Rooney hi a lungawi lo.
Merseyside Derby-a Liverpool nen 0-0 a an inhnehtawk ṭumin lakchhuah a ni a, hemi ṭum hian England captain hlui hian a lungawi lohna langsar takin a lantir tawh. DC United hian 2020 thleng an hnena cham turin contract an zawrh nia sawi a ni a, a zawm dawn a nih chuan July 1-ah contract a ziak thei chauh ang.
Rooney hian kum khatah pound maktaduai 15 a hlawh mek niin khawthlang media te chuan an tarlang mek a, Everton leh United-in an inpek ṭawm mek. United hian kum khatah Rooney hlawh atan pound maktaduai 10 an la tum mek a, DC hian kum khatah pound maktaduai thum pek an inhuam.
Ruahman anga engkim a kaltluang a nih chuan Rooney hlawh atan Everton, United leh DC United ten insen an huam vek a ṭul dawn tihna a ni! Everton hian Pathianni zan dar 7:30-ah West Ham an lenchilh ang.