McEnroe khumtu Nadal

World number 1 Rafael Nadal chuan John McEnroe-a record lo siam tawh khum turin clay court-ah a zawnin set 50 a la ta. American legend McEnroe hian 1984 khan carpet-ah set 49 a la zawn a, court chi ngaia set la zawn rei ber a nihna chu Nadal-a'n a rawn khum chiah.

Grand Slam vawi 16 champion tawh Nadal hian Ningani zan khan Diego Schwartzman chu 6-3, 6-4 a hnehin Madrid Open quarterfinal a lut a, vawi nga a champion tawhna hmun­ah nomawi a hnaih leh tawh hle.

Kum 31 mi Nadal chuan, "Tennis ka khelh zawh hunah ka sulhnu hi ka chhui kir a nga, a zawna set 50 ka lak tlin hi chhuang takin ka la sawi ve ngei ang. Hetiang hun tawng tur hian ka thawkrim em em a, kawng ṭhenkhatah chuan ka vannei ve bawk," tiin a sawi. Spain tlangval Nadal hian nizan khan Dominic Thiem a hmachhawn leh a, he thu buatsaih lai hian result kan hre hman lo.

Inkhel dangah Novak Djokovic hnehtu Kyle Edmund a kaltluang zel. Britain tlangval hian 6-3, 6-3 a David Goffin hnehin last 16 a paltlang ve bawk, quarterfinal-ah Milos Raonic hnehtu Denis Shapovalov nen an in­tawng leh ang. German rawlthar bei­sei awm Alexander Zverev pawh a thiam pariat zingah a inhlangkai ve bawk.