Season tawpah Swansea boss chhuak dawn

Premier League mangṭha thei dinhmuna ding mek Swan­sea City chuan manager Car­los Carvalhal contract chu an pawhsei sak dawn lo tih an tichiang.

Swansea City hian Pa­thianni zan dar 7:30-ah Premier League aṭanga tla tawh Stoke City an lenchilh dawn a, him turin hnehna an chan a ṭul bakah Southampton-in goal 10 vel tala Manchester City an hneh loh a ṭul ang.

Welsh club hian an result chhia an hai lo a, coach Carvalhal hian a tuar dawn ta niin a lang. Kum 52 mi manager hian season tawpah a contract a hmang zo tawh dawn a, Liberty Stadium-a cham zel turin inbiakna lo nei tawh mah se a match hnuhnung pariatah an chak tak miah loh avangin a tuar dawn ta a ni.

Swansea club board-in Carvalhal contract an pawhsei loh tur thu an sawi hma hian club Supporters’ Trust chuan club chairman leh neitu nihna ngah ber Huw Jenkins chu bang turin an lo nawr tawh.

Swansea City Supporters’ Trust hian club-ah neitu nihna 20% an nei a, club board-ah hian director an nei ve bawk.