Pliskova lakah Halep a tlawm

Champion lai Simona Halep chu Madrid Open quarterfinal aṭanga vuak tlak a ni a, Romanian nula hi he inelna bikah hian kum thum chhunga a chak lohna hmasa ber a ni - a nomawi kawl lai a chan dawn tihna a ni.

Ningani zan inkhelah Halep hi seeded parukna Karolina Pliskova lakah 6-4, 6-3 in a chak lo. Hnehna changtu Pliskova erawhin clay court-ah bik a zawnin match kua hnehna a chang tawh. Pliskova hian kar hmasa khan Stuttgart Open nomawi a chawi a, tun dinhmunah chuan Madrid Open khel zinga ranking sang ber a ni tawh.

Inkhel dangah Petra Kvitova chuan Daria Kasat­kina chu 6-4, 6-0 in a hneh ve bawk. Wimbledon vawi hnih champion tawh Kvitova leh Pliskova te hi final luh inchuhin an intawng zui leh dawn a ni.

Quarterfinal inkhel dangah seeded pasarihna Caroline Garcia chuan 6-2, 6-3 in Carla Suarez Navarro a hneh a, world number 1 hlui Maria Sharapova erawh Kiki Bertens lakah 4-6, 6-2, 6-3 in a chak lo thung.