NBA Conference Finals a hmuhnawm dawn

Pathianni zanah NBA Confe­rence Finals chu khelh ṭan a ni dawn a, zanlai dar 1:00-ah Boston Celtics leh Cleveland Cavaliers ten Eastern Conference Finals game 1 an khel dawn. May 15, zing dar 6:30-ah intum tawk tura ngaih Houston Rockets leh Golden State Warriors ten Western Conference Finals game 1 an khel bawk ang.

Mi thar Tatum
Celtics forward Jayson Tatum chanchin chu basketball ngainatute titi tui ber a ni chho a, kum ruk liam ta kha chuan Tatum hian LeBron James nena thla an lak dunna thlalak chu twitter-ah pho chhuakin King James chu amah 'follow back' turin a ngen.

Tunah erawh kum 20 mi Tatum leh kum 33 mi LeBron te hi an inhmachhawn dawn a, Cavs coach Tyronn Lue leh Tatum-a pa Justin te chu unau (cousin) an ni a, court chhehvelah chanchin ngaihnawm a tam hle.

Caveliers boss Lue chuan, "Kum 6-7 a nih lai han ngaihtuah let a, tuna a thlen chin kan hmuh leh chuan a mak a ni. A ṭhat chhoh ngei hi chu beisei mah ila, hetiang hi chu ka ring pha bik lo. Vawi khat khelhnaah chuan a khel ṭha em em a ni," tiin a sawi.

Tatum hian playoff match sarih chu a zawnin point 20 emaw a aia tam a khung tawh a, Larry Bird-a'n NBA a khelh season khatnaa a record a zawna match li chu a khum a, Kobe Bryant khumin hetiang tithei naupang ber a ni bawk.

Ennawm dang
Celtics-in Tatum bakah Al Hor­ford, Terry Rozier, Jaylen Brown leh Marcus Smart te an kawl a, Cavailers chhaih buai pha tur an ni.

Amaherawhchu Cavs tan LeBron chuan a vanglai a hmang chho leh mek a, ani hi chu tun huna ṭha ber ni loin NBA history-a player ṭha ber ang hiala sawi a ni a, Michael Jordan aia dahsangtu pawh an tam. Inhnialna chinfel theihna ṭha ber chu court chhung a ni a, Pathianni zana Cavs leh Celtics inkhel a hmuhnawm ang.