Premier League thununtu Mohamed Salah

English football-ah Mohamed Salah aia hming langsar an awm thei rih lo - Liverpool forward hi Premier League Player of the Season-ah thlan a ni a, player dang zingah Salah hnaih phak an awm meuh lo.

Salah hian he chawimawina dawng tur hian Manchester City midfielder Kevin De Bruyne leh Raheem Sterling, United goalkeeper David de Gea, Tottenham Hotspur striker Harry Kane leh Burnley defender James Tarkowski a khum - fans vote leh expert duhthlanna aṭanga thutlukna siam a ni.

Kum 25 mi forward hian chawimawina ngaihhlut dang FWA Footballer of the Year leh PFA Player of the Year chawimawina a lo dawng tawh bawk.

Bye bye Chelsea

Salah hian tun season-ah Liverpool tan inelna hrang hrangah match 50 khelin goal 43 a khung a, Premier League bikah goal 31 a khung tawh - nizan khan Brighton nen an inkhel a, result kan hre hman lo.

Kum 2014-a Chelsea a pan ṭuma beisei phak lo forward chuan, "Chelsea-ah khan ka hlawhtling lo tih sawi nuam an ti em em a, hei vang tak hian Premier League-a hlawhtlin hi ka chak em em ṭhin. He chawimawina ka dawng thei hi ka lawm takzet a ni," a ti.

Salah hian nipui transfer lai khan AS Roma aṭangin Liverpool hi pound maktaduai 34-in a zawm a, a tisual lo tih hretute kan ni.

Salah leh chawimawina
Mohamed Salah-a'n Liverpool a pan hnuah award 34 a dawng tawh a, team anga nomawi a chawi dawn leh dawn loh chu May 26 zana Real Madrid nen Champions League final an khelh hunah a chiang ang.

Chawimawina chu:
Champions League Player of the Week (3)
Champions League Goal of the Week (2)
Premier League Player of the Month (3)
PFA Player of the Month (4)
Liverpool's Player of the Month (7)
Liverpool's Goal of the Month (6)
Premier League Player of the Season
PFA Player of the Year
FWA Footballer of the Year
Liverpool's Player of the Season
Liverpool's Players' Player of the Season
CAF African Footballer of the Year
BBC African Footballer of the Year
Arab Footballer of the Year
PFA Team of the Year
CAF Team of the Year