Nomawi chawitu Bayern an chak lo

Bayern Munich-in Inrinni zanah tun season-a an chak loh chian ber ṭum an tawng a, an mual Allianz Arena-ah VFB Stuttgart 4-1 in an hneh lo. Bavarians hi season kharna match-ah mualpho mah se season tluana an chet ṭhat rah an seng a, Bundesliga nomawi chu a zawna a vawi ruk nan an chawi.

German champion hi season thara an jersey tur nen an inlan a, an manager Jupp Heynckes tana Bundesliga match hnuhnung berah result ṭha an hlawhchhuah sak thei lo. Bavarians hian Inrinni hian DFB Pokal final-ah Eintracht Frankfurt an hmachhawn dawn a, Bayern-in ṭha zawkin manager ropui Heynckes thlahna hun an nei thei ang.

Goal li lawih!
Stuttgart-in Daniel Ginczek hmangin minute ngana lekah hma an hruai a, Bavarians-in Corentin Tolisso hmangin minute 21-naah an sut mah se mikhual hian Anastasios Donis hmangin minute 42-naah hma an hruai nawn.

Second half-ah Bayern an insiamṭha thei lo a, Stuttgart midfielder Chadrac Akolo chuan minute 52-naah goal thumna a khung a, German forward Ginczek-a'n minute thum hnuah a goal hnihna leh an team goal lina khung lehin German champion tan thawhchhuah ngaihna a awm tawh lo.

An ropui tho
Bayern Munich hian an match hnuhnung berah hnehna chang lo mah se match 34-ah point 84 zet an hmu a, anmahni hnaih bertu Schalke aiin point 21-in an hmu sang zawk.

Goal khung kawngah pawh Bavarians hian goal 92 an khung a, goal 66 khungtu Hoffenheim aiin goal 26 in an khung tam zawk. Stuttgart lakah goal li lawih chhuah mah se season tluana an goal chhuah zat erawh goal 28 a la ni pha chauh a, league match hnuhnung bera an hneh loh Stuttgart (36) aiin goal riatin an la chhuah tlem tho.

Bayern hian German football an thunun a, Bundesliga-ah vawi 28 zet champion tawhin record chelhtu an ni a, tun ṭuma an nomawi pawh hi a zawna vawi ruk an chawina chiah niin hetah pawh record thar an siam.

Engtin zel?
Jupp Heynckes chuan May 9 khan kum 73 tlin champha a lawm a, kartawpah nomawi a chawi zui. German manager chuan, "Kum 72 tlin tawh hnua Bayern anga club lian enkawl a, dinhmun ṭha lo aṭanga dinhmun ṭhaa dah chhoh leh nawm dan hi ka sawifiah thiam lo," tiin an champion avanga a lawm thu a sawi.

Bundesliga chu season chu a tawp ta a, season tharah Bayern bakah Schalke, Hoffenheim leh Borrussia Dortmund ten Champions League an khel dawn a. Bayer Leverkusen-in Europa League an khel ang a, RB Leipzig-in qualifying round hmangin Europe inelna sang ber dawttu hi an khel thei ang a, German Cup final a zirin Europa League khel tur pakhat hi a hriat ang.