Torjagerkanone dawngtu Lewy

Bayern striker Robert Lewandowski chuan tun season Bundesliga-ah minute 2169 inlanin goal 29 a khung a, amah hnaih bertu Freiburg forward Nils Petersen aiin goal 14 in a khung hnem zawk. Bundesliga-a goal khung tam ber chawimawina hi 'Torjagerkanone' tih a ni a, Polish striker hian a vawi thum nan a dawng.

Polish striker Lewy hian 2013-14 season khan Borussia Dortmund tana a khelh laiin goal 20 khungin top scorer chawimawina hi a dawng tawh a, 2015-16 season khan Bayern a zawm hnuah goal 30 khungin top scorer a ni leh a, tun hi a vawi thumna chiah a ni.

Bayern boss Jupp Heynckes chuan, "Bundesliga-ah goal 220 ka khung a, Lewandowski hian season hnih thumah chuan a khum ngei ang," tiin kum 29 mi striker chuan goal a chhunzawm zel a ring. Lewy hian league match 257 a khelh tawh aṭangin goal 180 a khung tawh a, Heynckes-a record a khum ngei a rinawm. Amaherawhchu Bundesliga-a goal khung tam ber Gerd Muller-a record goal 365 pha tur chuan a ṭan mar deuh a la ngai thung ang.