World Cup khel lo tur Alves

Brazil right-back Dani Alves chu a khup hliam avangin World Cup-ah a inlan thei dawn lo. Kum 35 mi defender hian kar hmasa khan French Cup final-ah Les Herbiers a hmachhawn a, 2-0 a an chakna inkhelah hian minute 86-naah hliam vanga lakchhuah a ni.

Barcelona defender hlui hi World Cup khel turin a dam hman beisei zet a ni a, mahse a hliam te hi endik a nih hnuah Brazilian Football Federation chuan an defender pawimawh tan World Cup khelh chu 'thil theih loh' a nih thu an sawi.

PSG tan tun season-a match 41 inlan tawh Alves hian Brazil tan match 106 a khel tawh a, 2010 leh 2014 World Cup-ah khan ram tan a inlan. Russia World Cup-ah Brazil-in nomawi chawi beiseina sang tak an neih laiin a inlan ve thei dawn ta lo a ni.

World Cup-a vawi nga champion tawh Brazil hi Group E-ah an awm a, group match-ah hian Switzerland, Costa Rica leh Serbia te nen an inkhel ang.