Arsenal manager ni thei zingah Arteta

Arsene Wenger thlak tur a la chiang thei lo a, tun dinhmunah Manchester City assistant coach Mikel Arteta chu Arsenal manager thar ni thei tura hming langsar zingah a tel mek.

Player a nih laiin Arteta hian Arsenal tan match 150 khelin, khelmual chhunga player naupang zawkte kaihhruai thiam leh thluak ṭha a ni a, captain nihna pawh a chelh hman. Inkhelh a chawlhsan hnuah 2016 aṭang khan Pep Guardiola nen an thawkdun a ni.

June 14 a khelh ṭan tur FIFA World Cup hma ngeiin Arsenal hian season thar aṭanga an team enkawl tur hi an puan tur thu an sawi tawh. Chief executive Ivan Gazidis, head of football relations Raul Sanllehi leh head of recruitment Sven Mislintat ten an mi duh zawng an thlithlai mek a, anni pathum hian Arsenal board hnenah an mi duh chu an thlen ang.

Spanish Arteta bakah hian Gunners captain hlui ve tho Patrick Vieira hming pawh hmaih theih a la ni lo. France international hlui hian MLS club New York City a enkawl mek a, coaching lamah tawnhriat nei mah se Premier League te nena khaikhim chi chu a ni lo.

North London club hian in ṭhuahfai an tum tih chu a chiang chho zel a, an player hlui Freddie Ljungberg bakah season tawp ruala chawl tur Per Mertesacker te pawhin naupang lam chher hriam hna an thawk dawn - coach atan an player hlui tho an ruai a nih pawhin a mak lo ang.

Arteta leh Vieira te hming langsar viau mah se Juventus boss Massimiliano Allegri leh Barcelona enkawl tawhtu Luis Enrique te chu an buk a rit zawk hle tura ngaih a ni. Italian leh Spanish manager khawi emaw zawk la tur chuan sum an sen huai deuh a ngai dawn, chutihrualin Gunners hian hmasawn zel a, European club lian dangte elphak nih leh an duh a nih chuan khawvel huapa langsar an melh ngam a pawimawh.