Mizoram Football Association hmachhawp

Mizoram Football Association Executive Committee meeting chu May 12 khan Tourist Lodge, Chaltlangah neih a ni a, thu pawimawh hrang hrang an rel.

MFA GB Meeting: May 25, 2018 hian MFA Annual General Body Meeting chu Aizawlah neih a ni dawn. He hunah hian MFA leh DFA hruaituten season thara Mizoram football kal zel dan turah ro an rel ang.

2018-19 Season Calendar: MFA chuan season thara Mizoram Premier League club-te telna tur inelna chu a hnuaia mi ang hian a siam :

MFA Super Cup July 2018
I Day Football August 2018
MPL7 September 2018

NIVIA & MFA thawhhona: Mizoram Football Association chuan sports equipment siamtu company Nivia nen thawhona thuthlung an ziak dâwn. May 25-a MFA Annual General Body Meeting-ah thawhona hi ziah fel a ni ang a, Nivia Managing Director Rajesh Kharbanda chu he hun hmang tur hian a lo kal ang. Nivia hian Mizoram State team jersey a tumsak chhunzawm zel ang a, MFA official competition-a hman tur football leh futsal ball MFA a pe ang.

Kolasib-ah NE Zone Sub Junior Football: All India Football Federation buatsaih National Sub Junior Football Championship Northeast Zone Qualifier chu Mizoram-in August-ah hian a thleng dâwn a, Kolasib-a nghah turin MFA chuan a rel. Kolasib-ah hian sports stadium ṭha tak sorkarin a siam mêk a, artificial grass phah mek a ni a, August-ah hi chuan hman theih a ni tawh tura beisei a ni.

Inter District U19 Football: MFA chuan Assam Rifles nen thawk dunin June, 2018 hian Inter District Junior Football for Boys & Girls a buatsaih dawn. He hunah hian District Football Association zawng zawngte mipa leh hmeichhe team tir thei tura inbuatsaih turin a ngenin a hriattir nghal a, team tinte hi sports equipment kim a thlawna pek vek an ni ang. MFA leh AR-te hian nikum khan junior football inelna hlawhtling tak an lo buatsaih tawh a ni.

MHIP Football: MHIP leh MFA ṭangkawpin Inter Branch MHIP Football Tournament a buatsaih tur chu MFA Executive Committee chuan lawmawm a tiin team tam thei ang ber tel turin a sawm a, hmeichhe football hmasawnna tura thawh zel an tum.

- Issued by Information and Publicity Committee, Mizoram Football Association