Kvitova kutah Madrid Open title

Petra Kvitova chuan Kiki Bertens hnehin a vawi thum nan Madrid Open title a la. Czech Republic nula a champion chiah hian record a siam nghal a, hmeichhe player zingah Madrid tual laia vawi thum champion thei hmasa ber a ni.

Inrinni zan final inkhelah world number 10 Kvitova hian awlsam takin hnehna a chang mai bik lo. Dutch player nen darkar hnih leh minute 25 an inkhelh hnuah 7-6 (8-6), 4-6, 6-3 in a chak zawkah a ṭang hram. He hmunah hian 2011 leh 2015 khan hlawhtlinna a lo chang tawh bawk.

Kum 28 mi Kvitova hian tun thla tir khan Prague Open nomawi a chawi tawh bawk a, tournament a khelh pahnihah a zawna a champion theih avangin clay court inelna lian French Open-ah pawh rinkai a ni ang. A nomawi 24-na chawi tur hian unforced errors vawi 58 ngawt nei mah se winners vawi 39 a vaw chhuak thung a ni.

World number 2 Kvitova chuan, "Ka khingpui ball vuak a na in dawnsawn a harsa hle a, mahse harsa tak chungin ka pe let thei hram zel a ni. A tu zawk pawhin nomawi chawi ni ila a awm tho, a vannei zawk ka ni," tiin awlsam taka hnehna a chan bik loh thu a sawi.

World number 20 Berten pawhin chak lo mah se hma a sawn, final a thlen theih nan hian world number 2 Caroline Wozniacki leh Grand Slam vawi nga champion tawh Maria Sharapova te a hneh thei a, ranking chhuak tharhah chuan 18-na a ni dawn–tennis a khelh hun chhunga a tawn san ber ṭum a ni ang.