Naktuk zing 6:30-ah Rockets vs Golden State

NBA Western Conference finals-ah Houston Rockets leh Golden State Warriors te an inhmachhawn dawn a, NBA finals ai pawhin conference finals hian ngaihven a hlawh zawk hial ang. Game 1 hi naktuk zing dar 6:30 hian Toyota Center, Houston-ah an khel dawn.

Regular season-ah Houston Rockets chuan vawi 65 hnehna changin vawi 17 an chak lo a, chiang takin pakhatna an ni. Golden State Warriors hian vawi 58 hnehna chang ve bawkin vawi 24 chak loin Western Conference-ah pahnihna dinhmun an hauh ve bawk.

Rockets hian playoff final lut turin Minnesota Timberwolves leh Utah Jazz te 4-1 in an hneh ve ve a, Golden State hian San Antonio Spurs leh New Orleans Pelicans chu 4-1 ve vein an hneh a, conference finals lut turin harsatna an tawk lo.

Golden State hian Stephen Curry, Draymond Green leh Klay Thompson bakah Kevin Durant te an neih avangin season liam taah champion turin harsatna an tawk lo. Amaherawhchu kuminah anmahni el tawk tur an awmah a ngaih theih a, Chris Paul, James Harden leh Clint Capela te telna Houston nena an inkhel hi a hmuhnawm ang.