Season 55 hnuah Hamburg an tla

Germany football inelna sang ber Bundesliga hi 1963 aṭangin khelh ṭan a ni a, a tir aṭanga tla miah loa khel thei awmchhun chu Hamburg an ni. Mahse, Inrinni zan khan an record duhawm tak hi thai boin a awm ta–German champion vawi ruk ni tawh hian season tharah Bundesliga an khel chhunzawm ve thei dawn ta lo.

Volksparkstadion-a inkhelah Hamburg hian Borussia Monchengladbach 2-1 in hneh mah se, inkhel dangah Wolfsburg chuan 4-1 in Cologne an hneh ve thung. Point 33 neitu Wolfsburg-in relegation playoff an khel dawn a, point 31 nena season khartu Hamburg erawhin Bundesliga an mangṭha rih a ṭul ta a ni.

Bundesliga aṭangin Hamburg leh Cologne te an tla a, 2. Bundesliga aṭangin 1. FC Nurnberg leh Fortuna Dusseldorf te an kaisang a, Holstein Kiel leh Wolfsburg ten playoff an khel thung ang. Holstein Kiel hi 2017 khan third division aṭanga rawn kai chho chauh ni mah se hma an sawn chak hle.

Chak mah se...
Bundesliga match hnu-hnung ber khelh a nih hma hian Hamburg tan inhamtang tur chuan hnehna an chan bakah, an chunga awm Wolfsburg an chak loh tel a ngai tawh–hmabak hautak tak nei chungin khelmual an lut.

Minute 11-na lekah video assistant referee (VAR) hmangin penalty an chawi a, midfielder Aaron Hunt-a'n goal hmahruai khung nan a hmang; chawlhlawk hmain mikhual lam tan Josip Drmic-a'n a sut leh thung.

Hamburg midfielder Lewis Holtby-a'n second half-ah a ball pet thiam zia a lantir a, yard 16 aṭangin an goal hnihna a thlawh lut. Hun tawp dawnah boruak a sang a, striker Bobby Wood hnawhchhuah ni mah se an goal an veng tluan thei tawh thung.

An tla dawn tih a chian hnuah Hamburg fans lamin awmdan an thiam lo. Volksparkstadion-ah bawlhhlawh leh puak thei thil an vawm lut a, minute 15 chhung vel an buai hnuah inkhel an titawp fel thei chauh.

Hamburg fans zinga buaina siamtu hi a tlem zawk an ni a, chutih rualin an thiltih avangin an club zahawmna an ti bawrhbang hle. Hamburg fans ruhkawl tam zawk chuan, "Kei ni chu Hamburg kan ni a, nang chu i ni ve lo," tiin goal hnunga awm buaina siamtute an dem thu an au chhuah pui. European Cup vawi hnih chawi tawh ṭantute zingah hun harsa leh hrehawm an tawh lai pawha rinawm leh dawhthei taka inkhel entu an tam zawk.

A na vawng vawng
Club president Bernd Hoffmann chuan, "Hamburg SV tan chuan hei aia na hi a awm thei tawh rih chuang lo, he club hian hlut bik riauna a neih kha a hloh ta a ni," tiin Bundesliga aṭanga an tla chu pawi a tih thu a sawi a, hrehawm ti hle mah se an tan khawvel a tawp ta tihna a la nih bik loh thu a sawi.

Hamburg hi 1919 khan din a ni a, German champion vawi thum niin 1963-64 season-a Bundesliga an tih ṭan dawn khan team 16 tel tura sawm zingah an tel. Bundesliga-ah hian vawi thum bawk champion lehin European Cup-ah vawi hnih an champion tawhbakah European Cup Winners' Cup an la tawh bawk.

Tun hnaiah Hamburg an tlahniam a, 2014 hma lama a thiam 15 zinga tel ziah khan tun hnai season nga chhungah erawh a hniam panga zingah an tel deuh zel a, 2014 leh 2015 te khan relegation playoff hmangin Bundesliga khel turin inpetling zel mah se kuminah erawh an vanneihnain a tlin ta bik lo a ni.

Hamburg tana Mellung pawimawh
1887 : Club din kum
1923 : German champion
1928 : German champion
1960 : German champion
1963 : German Cup-ah an champion.
1976 : German Cup-ah an champion.
1977 : European Cup Winners' Cup-ah an champion.
1977 : Kevin Keegan chu pound 500,000 in an lei.
British transfer record a ni.
1979 : German champion : A vawi khat nan Bundesliga
champion an ni
1980 : European Cup semifinal-ah Real Madrid 5-1 in an hneh.
1980 : European Cup final-ah Nottingham Forest an hneh lo a,
pahnihna an ni.
1981 : Austrian coach Ernst Happel-a'n team a enkawl a, a kaihhruaina
hnuaiah European Cup leh Bundesliga title an la.
1982 : German champion
1983 : German champion
1983 : Juventus 1-0 a hnehin European champion an ni.
1987 : German Cup-ah an champion.
2014 : Bundesliga relegation playoff an khel.
2015 : Bundesliga relegation playoff an khel.
2018 : Bundesliga aṭangin a vawi khat nan an tla.