South West Asian Football Federation a piang Saudi Arabia, UAE leh Bahrain kiangah India

Asia khawmualpui huam chhungah football pawl thar a piang a, a hming chu South West Asian Football Federation tih a ni.

May 10-a din pawl tharah hian South Asia leh West Asia huam chhunga ram 10 an tel a, India bakah hian Bahrain, Bangladesh, Kuwait, Maldives, Pakistan, Saudi Arabia, Sri Lanka, United Arab Emirates leh Yemen an tel.

Asian Football Confede­ration hnuaiah ram mal ni lo federation an awm nual a, hei hi AFC-in dan ang thlapin a pawmpui kher ngai lo. Mahse, AFC hian a thuphung erawhin a hriatpui ṭhin a, SWAFF hi din ni tawh mah se AFC aṭangin pawmpuina a la awm rih lo.

Pawl din chhan
SWAFF pianchhan dik tak hi West Asian Football Fede­ration-a inhmuhthiam lohna a awm vang nia sawi a ni a, West Asia ramte inhmuhthiam loh chhan ber nia sawi chu WAFF president Jordan Prince Ali bin Al Hussian chuan an head­quarters Jordan khawpui Amman-a innghat chu Saudi Arabia khawpuia pakhat Jeddah-a innghah a remtih theih loh vang a ni.

Hei mai hi a la ni lo cheu, SWAFF din chhan hi Saudi Ara­bia-in Asian Football Confe­deration thunun an tumna kawng khat nia sawi a ni a, Ningani zana inhmuh­khawm­naa sawi a nih dan chuan World Cup zawhah general assembly hmasa ber neih tur a ni a, hemi hma chu Saudi Arabian FA chief Adel Ezzat chu president a ni rih ang.

Intawhkhawmnaah hian South Asian Football Federation president Kazi Salahuddin chu Bangladesh aiawhin a tel ve bawk a, South Asia ram zingah Nepal leh Bhutan chu he pawl thara la tel lo an ni.

A la chiang lo
Ningani zana SWAFF dinnaah hian All India Football Federation aiawhin general secretary Kushal Das chu a tel a, Kushal Das chuan May 25-ah ram 10 aiawh president te an inhmuhkhawm leh vek tur thu a sawi a, hemi zawhah hian SWAFF kal zel dan tur chu a chiang chauh ang.

Kushal Das chuan, "Ningani zanah kan inhmu khawm chauh a, keini lam chuan AIFF Executive Committee pawm­puina neih leh phawt kan la mamawh a ni," a ti a, Indian FA rorelna sang berin SWAFF-a tel an duhna chu an remtih ve leh phawt a ngaih thu a sawi.

AIFF secretary chuan sawi zawmin, "SAFF pawh a la kal chhunzawm zel dawn a, regio­nal federation thar pakhat a piang ve a ni mai. Mahse, keini chuan AFC pawmpuina hmuh phawt te pawh kan la duh a, engmah a la chiang lo," a ti.

India tana hlawkna?
Saudi Arabia lama media report-a a lan dan chuan SWAFF hian FIFA hnuai tih loha ram leh ram inelna lian ber buatsaih an tum! Hei tak hi AFC tan thu hriat nuam a ni lo mai thei a, chutihrual chuan he ruahmanna hmasa hi hlawhtling lo pawh ni se SWAFF Championship a awm ngei dawn a, hei ringawt pawh hi India tan chuan hlawkpui tham a ni.

Tun dinhmunah India hi South Asian Football Federa­tion-ah Maldives, Nepal, Bhu­tan, Bangladesh, Sri Lanka leh Pakistan te nen an awm ho - SAFF Championship khelh ṭhin a ni a, a nihna diktakah chuan he inelna hi India-in a thunun viau chungin a ram elpui ṭhin thlirin hma a sawn phah tak takin a lang lo.

SWAFF-a an awm a nih erawh chuan India hian Asian Cup khel 'kher' lo pawhin Asia rama team lian Bahrain, Saudi Arabia leh United Arab Emirates-te chu 'regular' takin a inkhelhpui thei dawn tihna a ni a, hei ringawt pawh hi India tan chuan hlawkna a ni ang.