Delhi beiseina a chuai
Indian Premier League khelh mekah Delhi Daredevils-in beisei tur an nei ta lo - Delhi club hian Inrinni zan khan Royal Challengers Bangalore chu wicket ngain an hneh lo a, match hnih khelh tur la nei mah se playoff an khel dawn lo tih a chiang tawh.
Delhi khawpuia inkhelah mualneitu an bat hmasa zawk a, opener Prithvi Shaw (2 runs) chu hma takah out mah se Rishabh Pant (61) a rawn inlar a, Vijay Shankar (21) leh Abhishek Sharma (46) te ṭha takin an rawn bat bawk a, over 20-ah wicket li hloha run 181 siamin target pangngai tak an rawn tuk.
Royal Challengers-in hma takah Parthiv Patel (6) leh Moeen Ali (1) an hloh zui avangin DD beiseina a nung hman - mahse Bangalore club hi khawvela batsman hot ber pawl Virat Kohli (70) leh AB de Villiers (72, not out) neitu an ni miau a, over 19-ah an target umphain wicket nga chiah an hloh - DD beiseina tihtawp a ni a, playoff an lut thei tawh lo.
KKR tan Narine
Inrinni zan inkhel dangah Kolkata Knight Riders chuan run 31-in Kings XI Punjab an hneh ve bawk a, run 75 vaw chhuaktu Sunil Narine chu player langsar a ni. KKR hian over 20-ah run 245 ngawt siamin wicket ruk an hloh a, target huphurhawm tak an tuk.
Kings XI Punjab tan KL Rahul (66) chuan ṭha takin bul rawn ṭan nghal mah se KKR run an lo siamtir hnem hret a, over 20-ah run 214 siama wicket riat hlohin an tlawm - Kolkata club tana wicket thum latu Andre Russell hming lam hmaih theih a ni lo.
Rajasthan tan Buttler
Zirtawpni zan inkhelah Rajasthan Royals tan Jos Buttler chuan run 95 ngawt vaw chhuaka a tawp thleng damin Jaipur club hi hnehna a chanpui ve bawk.
RR hian Chennai Super Kings-in over 20-a run 176 an siam chu an um a, batsman dangin beisei pha lo mah se English batsman chet ṭhat zarzoin obver 19.5-ah an target hi an umpha a, wicket ruk hlohin ball khat chiah a awm tawh tihah hnehna an chang.