Real tan Gareth Bale a parvul
Zinedine Zidane hnuaia hmun pawimawh chang phak meuh lo Gareth Bale-a'n Real Madrid tana a hun ṭha neihchhunah en kan chi a ni lo tih a pholan chhunzawm zel a, Celta Vigo lakah goal hnih khungin Los Blancos chu 6-0 in hnehna a chanpui.
Real tan hian Bale bakah Isco, Achraf Hakimi leh Toni Kroos ten goal khat ṭheuh an khung bawk a, Madrid khaw club-in goal khung an harsat loh tehlul nen Celta defender Sergi Gomez chuan an lamah a ti goal bawk a, Real tan goal a 'khilai'.
Hei le BaleṬ
Minute 13-na lekah Bale-a'n Real tan goal hmahruai a khung a, minute 30-naah a goal hnihna a chhunzawm bawk - Luka Modric hnen aṭanga a ball hmuh ṭha tak chu hmahruaina goal ni turin a khung a, mawi zeta Jonny Castro a bum hnuah a goal hnihna a khung bawk.
Hliam vangin tun season-ah Bale a talbuai a, Zidane-a duhthlanna hmasa a ni lo bawk. Mahse, Welsh forward hian hetichung hian a hun ṭha neih chhunah erawh a theihna a pholang ṭhin a, a match hnuhnung pali-ah goal li a khung tawh - tun season-ah match 37 khelin goal 18 a khung!
Bale faktu Zidane
Welsh forward-in league-a a match hnuhnung 11 aṭangin goal kua ngawt a khung a, Zidane tan Bale chungchang sawi loin press conference a khar theih ta meuh lo. Zidane chuan, "Bale khan a hna ṭha takin a thawk a, goal-a khung bawk avangin ka lawmpui takzet a ni.
"Bale khan goal a khung a ni mai lo a, a inkhel pumpui kha thlir ila, a thawhhlawk em em. Mahse, a bak erawh engmah sawi theih ka nei lo. Villarreal nen kan la inkhel dawn a, chumi zawhah Champions League final kan khel ang. Chu zawng chu a ni e," a ti.
Zidane lu tihaitu
Bale bakah Isco chu player langsar a ni a, Spanish midfielder hian Champions League final khelh ngei tumin innghahna tlak a nihzia a pholang leh tawh - khawthlang media te chuan Real-in Liverpool an hmachhawn huna an starting XI tur an inrinsiak leh tawh.
Zidane erawhin engmah a la sawi chiang duh lo. French manager chuan, "Liverpool hmachhawn turin tute nge ka thlanchhuah dawn ka la hre lo. Mahse, ka tan chuan tuna kan awmdan hi a ṭha zawk a, player tinten inkhelh an inrin vek hi a ṭha. Final-a thutlukna siam a harsa dawn a, mah se chu chu ka duhdan a ni," tiin a sawi.
Real dinhmun
Real tan an thiampuipa Cristiano Ronaldo chuan Celta hi hliam vangin a hmachhawn ve thei lo a, Champions League final-a Liverpool hmachhawn turin a dam hman beisei a ni - 100% a ni hman ang em tih erawh zawhna awm thei a ni a, Liverpool lamin Ronaldo inhliam hi dam chak turin an duhsak lo tawp ang.
Right back Dani Carvajal dinhmun a la chiang lo a, Real tana thu lawmawm erawh Carvajal awm loh hlanin kum 19 mi Hakimi chuan Spanish defender hmun ruak zo takin a luah.