Aizawl FC kuta innghat Bengaluru FC
Zanin dar 6:45 hian AFC Cup group match hnuhnung ber chu khelh a ni dawn. Group E aṭanga knockout stage lut tur a la chiang lo, Bangabandhu National Stadium-ah Abahani Dhaka-in AIFF Super Cup champion Bengaluru FC an mikhual dawn a, Aizawl FC-in Guwahati-ah New Radiant an hmachhawn bawk ang.
Maldives club Radiant hian Bengaluru FC nen point 12 ve ve an hmu a, head to head-ah an ṭhat zawk avangin Inter Zone playoff semifinals khel turin Mizo club hneh a tawk. ISL club Bengaluru FC hmalam chu Aizawl FC kutah a awm tihna a ni.
Beisei tur nei tawh lo Aizawl FC hian Guwahati-ah player 18 an hruai a, foreigner pali Masih Saighani, Alfred Kemah Jaryan, Leonce Dodoz leh Andrei Ionescu te an hruai a, state pawn player keeper Avilash Paul pawh telin veteran player S. Malsawmtluanga'n a ho a. ISL club aṭanga loan-a an hawh H. Lalmuankima leh Lalchhawnkima te erawh AFC Cup-ah hian chhawr theih an nih loh avangin an hruai tel lo.
Aizawl FC hian Abahani Dhaka muala point khat an hlawh chhuak tih loh chu tun inelnaah hian point an la hmu lo a, zanina an hmachhawn tur New Radiant hi khualmualah 3-1 in an hneh lo. Mizo club hian season ṭha taka khar turin Maldives club lakah result ṭha an mamawh a, point an hlawh chhuak a nih chuan anni aiin Bengaluru FC an lawm zawk ang.
Bengaluru FC tan chak ngei ngei a ngai a, Bangladesh club Abahani hi an mualah 1-0 in an hneh. AFC Cup-ah goal difference an en avangin Bengaluru tan goal khung tam a ṭul hran lo a, point thum hlawh hrim hrim bakah Mizo club-in point an hmuh ve bawk a ṭul dawn a ni.