Coronavirus-in khawvel rûn lo ta se, Naktuk hi UEFA Euro 2020 khelh hun tur

Football ngainatuten ram inelnaah FIFA World Cup an ngaina ber a, a dawt chu UEFA European Football Championship a ni. World Cup leh Euro C'ship hi Mizo nawlpui en ṭhin a ni a, football tui lo tan pawh rual pawl nan en tho a ngai.

Amaherawhchu hripui hlauhawm coronavirus-in khawvel a run a, ruahmanna angin infiamna khawvel a kal thei lo. Covid-19 hi awm ta lo se chuan naktuk zan hian UEFA European Football Championship khelh ṭan a ni dawn a, tunah erawh nakkum nghah a ngai ta.

Covid-19 in khawvel pum nunphung a tibuai a, infiamna pawhin a tuar hle. Kum dang chu ni se tun ang hunah chuan Premier League champion a hriat tawh dawn a, Liverpool-in an phu vang rengin league nomawi an chawi tawh ang. La Liga-ah ni se Barcelona emaw Real Madrid emaw an champion tawh ngei ang. Bundesliga leh Serie A-ah ṭum dang ang thoin Bayern Munich leh Juventus te an champion ngei a rinawm bawk.

Tunah erawh Mizote league ngainat Premier League, La Liga, Bundesliga leh Serie A-ah champion an la awm lo a, Euro 2020 reng rilruah a lang ta lo. Hei mai hi a ni lo, European Championship khel tur ram 24 a la hriat kim loh. Fixtures erawh pawh fel a ni tawh a, ram pali chu playoff hmanga la zawn tur a ni.

European Championship hi kum 1960-ah khelh ṭan a ni a, kumin hi kum 60-na chiah a ni. Inelna thleng hmasa ber hi France an ni a, Soviet Union an champion hmasa ber. 

Kumin hi kum 60-na a nih avangin inelna thlen dan pawh an ti danglam hret a, ram 12-in khawpui 12-ah an thleng dawn. Heng khawpui 12 te chu Rome (Italy), Baku (Azerbaijan), Saint Petersburg (Russia), Copenhagen (Denmark), Amsterdam (Netherlands), Bucharest (Romania), London (England), Glasgow (Scotland), Bilbao (Spain), Dublin (Republic of Ireland), Munich (Germany) leh Budapest (Hungary) te an ni.

UEFA-in ruahmanna ṭha leh danglam tak siam mah se rinlawk lohin Covid-19 a rawn inlar a, inelna kalphung leh hrileng a inrem lo. Hei chauh hi a ni lo, hrileng nghawng a len tak em avangin inelna ṭan turin an inpeih hman lo hrim hrim a, kum khat tawpin inelna an sawn. Kum 60 lawmna kha kum 61-naah an khelh a ngai dawn ta a, chutihrualin kum 2021-a khelh tur ni mah se Euro 2020 a ni dawn tho.

June 12 - July 12, 2020 a khelh tur Euro 2020 chu June 11 - July 11, 2021 ah khelh a ni dawn ta a, playoff hmangin hmunruak pali hnawh khah a la ngai. UEFA chuan playoff hi inelna thar UEFA Nations League nen a thlun zawm a, hemi hmang hian playoff khel tur hmunruak pali hi an zawng dawn.

Path A-ah Iceland Vs Romania, Bulgaria Vs Hungary; Path B-ah Bosnia & Herzegovina Vs Northern Ireland, Slovakia Vs Republic of Ireland; Path C-ah Scotland  Vs Israel, Norway  Vs Serbia; Path D-ah Georgia Vs Belarus, North Macedonia Vs Kosovo te an awm.

Covid-19 vangin playoff khelh hun a la hriat theih loh a, path tin aṭang hian pakhat zel an tling ang.

––––––––––––––––––––––––––––––––––––––––––––––––

Group A: Rome (Italy) & Baku (Azerbaijan)

Turkey, Italy, Wales & Switzerland

––––––––––––––––––––––––––––––––––––––––––––––––

Group B: Saint Petersburg (Russia) & Copenhagen (Denmark)

Denmark, Finland, Belgium & Russia

––––––––––––––––––––––––––––––––––––––––––––––––

Group C: Amsterdam (Netherlands) & Bucharest (Romania)

Netherlands, Ukraine, Austria, Playoff Winner

––––––––––––––––––––––––––––––––––––––––––––––––

Group D: London (England) & Glasgow (Scotland)

England, Croatia, Czech Republic, Playoff Winner

––––––––––––––––––––––––––––––––––––––––––––––––

Group E: Bilbao (Spain) & Dublin (Republic of Ireland)

Spain, Sweden, Poland, Playoff Winner

––––––––––––––––––––––––––––––––––––––––––––––––

Group F: Munich (Germany) & Budapest (Hungary)

Portugal, France, Germany, Playoff Winner