I hriat loh Salah chanchin... Sipai ni ta lo Mohamed Salah!

Hmelma aiah ball a pet a, sipai boot chhah tak aiah ball boot a bun a, sipai thawmhnaw, a hringa ṭial aiah football jersey a ha a, Egypt sipai ni tura rin kha tunah chuan 'Egyptian King' tih hiala koh a ni ta zawk.

July 2014 kha chuan an ram dana sipaia thla 12 tal ṭang turin Mohamed Salah-a'n buaina a tawk a, mah se a hunlaia Egypt prime minister Ibrahim Mahlab thutlukna chuan vawiinah Egypt tan thil ṭha a thlen a, kum 28 hnua a vawi khat nan Salah-a'n Egypt chu World Cup a hruai thleng.

Liverpool forward hian England-ah pawh amah khum zotu a hmu meuh lo - mimal chawimawina dawn theih zawng zawng chu a hui fai vek a, Reds tan tun season-ah match 51 khelin goal 44 a khung tawh. May 26 zanah Real Madrid nen European champion nih an inchuh dawn a, Salah-a'n en bik a hlawh ang.

Sipaiah maw?
Ram dinhmun a zirin kalphung a awm ṭhin a, Egypt sorkar hian kum 1840 aṭang tawh khan mipa fa tana sipaia ṭan ngei ngeina tur dan an nei. He dan hnuaiah hian Egyptian mipa, kum 18-30 inkar te chu an ram sipaiah thla 12 aṭanga thla 36 inkar chu an ṭan a ngai.

Ngaihhnathiamna dan erawh a awm ve tho - unau mipa dang pianpui nei lo chu he dan aṭang hian ngaihthiam an ni a, lehkha an zir chhung chu sipaia ṭang tur hian tih luih theih an ni lo bawk a, mah se kum 25 hmain an zirna hi an zawh ngei a ngai thung - ram pawn lama awm tur chuan Ministry of Defense hnen aṭanga phalna neih thlap a ngai!

Mipa chuan kum 30 a tlin tawh hnuah erawh sipaiah hian ziah luh theih an ni lo a, chhungkaw innghahna leh chawmtu awmchhun an nih chuan hriatthiam an ni bawk - college aṭanga graduate te chu duhsak an ni a, thla 12 aṭanga 36 inkara an tih tur an hlen hnuah hian sipaia ṭan chhunzawm zel turin 'special rank' nen sawm ṭhin an ni.

Tichuan...
January 2014 khan Chelsea chuan Salah an lakluh thu an puang a, Liverpool nen inchuh mah se pound maktaduai 11-in Egypt international hi an chang. Mahse, England a pan hnu rei loteah Salah-a'n buaina a tawk a, chu chu Ministry of Higher Education (Egypt)-in education program anga ram pawna awm an phalsakna an tihtawp thu a ni.

Ram pawna Salah awm phalna tihtawp a nih avangin dan ang chuan Egyptian forward hi sipaia ṭanga tura an rama a kir a ṭul a, a hunlaia Egypt national team director Ahmed Hassan chuan, "He thu hian Salah a ṭhawng em em a, 'He ram tana theihtawp ka chhuah lai hian hei hi maw chhanna min pek chu?' tiin min zawt a ni," a ti a, Salah rilru nat thu a zep lo.

Hetih hunlai hian Salah-a'n Chelsea-ah a career hun duhawm ber hmang lo mah se Egypt tana lunghlu ṭhami a nihna erawh a hloh lo - buaina a tawh lai hian ram tan match 29 khelin goal 17 a khung tawh a, hei hi Egyptian FA lam pawhin hriatpuiin hma an lakpui.

Thutlukna dik chu
Egypt football thuneituten sipai-a Salah a ṭan lailawk chuan a football kum a hloh ang a, sipaia a ṭan hun chhung hian a professional career-ah thui takin nghawng a nei thei dawn tih an hai lo.

Hei vang hian Egypt FA chuan Salah-a'n Europe-ah a football nun a chhunzawm theih nan nasa takin hma an la a, a hunlaia Egypt coach Shawky Gharieb, Higher Education Minister leh an ram Prime Minister Ibrahim Mahlab te Salah chungchang sawiin an inhmu khawm a, Salah hi sipaia ṭang lo turin an hrethiam!

Mi pathum inhmukhawm hian, "Salah hi sipaia a ṭan chuan Egyptian football hmalam hun tan a pawi dawn a ni," tiin thutlukna an siam a, thutlukna dik an siam tih chu a hretute kan ni.

Zinkawng ngaihnawm
Egypt sorkar hriatthiamna a chan hnuah beisei ang ngawtin Salah zinkawng erawh a awlsam lo. Chelsea-a a season hmasa berah hian match 11 khelin goal hnih a khung a, sipaia ṭang lo tura thutlukna siam a nih hnuah Chelsea tan match thum chiah khelin goal a khung lo.

"Salah hi sipaia a ṭan chuan Egyptian football hmalam hun tan a pawi dawn a ni," tia thutlukna siam lo ni tawh chu nuihzatthlak a chang a, thutlukna siamtute tan pawh uang hmel put ngam a ni lo - a hunlaia Chelsea manager Jose Mourinho chuan ualau takin Salah hi a sawisel bawk.

February 2015-ah Fiorentina lamah Salah chu loan-a kaltir a ni a, Egyptian mipuite beiseina chu Chelsea tan chuan 'in zir belh mamawh' player ve mai a ni.

A inṭanna chu...
Fiorentina-a pan hnuah Salah-a'n a thiamna hloh tawh nia lang a chhar let a, Italian club tan match 26 a inlan sakah goal kua a khung nghal! 2015-16 season-ah Roma-ah loan-in a khelh chhunzawm a, match 42 khelin goal 15 a khung.

Roma-in Salah thiamna an hmu fuh a, pound maktaduai 13 velin a nghetin an lalut nghal - Chelsea-in thutlukna an siam tawh a zawnga pawi ber pawl an siam tih an inhre lo. FC Basel aṭanga lar chhuak forward hian match 41 khelin goal 19 a khung a, Liverpool an lo lang nghal.

Merseyside club hian 2011 transfer bazar-a an lo chan tawh loh forward hi pound maktaduai 34-in an lalut - Chelsea a hlawhchham tawh player tana Liverpool insen zat a tam a, Salah lakah Reds fan-te ngei pawhin beiseina neih thiam dan an harsat.

Tunah erawh zawng...
Premier League Player of the Season-a thlan a nih ṭum khan Salah chuan, "Chelsea-ah ka hlawhchham tawh avangin he hmuna lo kir leh hi ka châk reng ṭhin a ni," a ti a, amah ringhleltute hmaah a theihna tak tak pholan a duh.

A hlawhchham tawhna mualah huaisen takin Salah a pen chhuak a, league-ah goal 32 khungin Premier League season khatah match 38 khelh a nih hnua heti zat goal khung thei hmasa ber record a siam a, Salah hnunga hming intlarte chu Alan Shearer, Luis Suarez leh Cristiano Ronaldo te an ni.

Tunah chuan a hunlaia Salah hralhtuah Mourinho leh Chelsea an inpuh tawn tawh. May 26 zan a lo her chhuak ang a, Kiev khawpuia Real Madrid leh Liverpool ten Champions League nomawi an inchuh hunah khawvelin a ngaihven ang.

Chutih hunah chuan Liverpool beiseina, rinna leh duhna zawng zawng phurtu Mohamed Salah a lo pen chhuak ang a, amah ṭantute beisei anga Liverpool a champion pui a nih phawt chuan nakkumah Ballon d'Or chawimawina a kutin a hum a nih pawhin a mak lo ang a, kum li liam taa Egyptian football hma hun thlir chunga Salah hrethiamtute kha an ram mipuiin lawmthu an hrilh nawn ang.