Manager chawimawina 2 dawngtu Guardiola

17th May, 2018

Manchester City manager Pep Guardiola chu Premier League manager of the season leh League Managers Association manager of the year atana thlan a ni.

Spanish manager hian chawimawina hi Thawhlehni zana League Managers' Association Annual Awards sem zanah a dawng.

Sir Alex Ferguson Trophy
LMA Manager of the Year hi Sir Alex Ferguson Trophy tih a ni bawk a, chawimawina dawng tur hi manager rualin an thlang ṭhin.

Nomawi chu tehna pawimawh ber a ni bik lo a, an team dinhmunte an teh tel bawk avangin tun hma pawhin Eddie Howe (Bournemouth) leh Alan Pardew (Newcastle United) te pawhin chawimawina hi an dawng tawh a. Chutihrualin nikum leh kuminah chuan nomawi chawitu Leicester City manager Claudio Ranieri leh Antonio Conte ten an dawng.

Pep-a hi league champion ni chunga LMA Manager of the Year ni thei parukna chauh a ni. Chawimawina dawng tur hian Jurgen Klopp (Liverpool), Sean Dyche (Burnley), Nuno Espirito Santos (Wolves), Neil Warnock (Cardiff) leh John Coleman (Accrington Stanley) te aiin vote a hmu tam zawk.

Manager of the Season
Premier League Manager of the Season erawh sponsor, journalist, player hlui leh manager ten an thlang thung.

Pep-a hian chawimawina dawng tur hian Rafael Benitez (Newcastle United), Sean Dyche (Burnley), Roy Hodgson (Crystal Palace), Chris Hughton (Brighton) leh Jurgen Klopp (Liverpool) te a khum bawk.

Pep-a thukhawchang
Guardiola hian Premier League-ah City chu point 100 a hmuh pui a, record siam chungin nomawi a chawi a, goal 106 zet khungin point 14 chiah an hloh.

Spanish manager Guardiola chuan, "England-ah hian thil danglam ti tura rawn kal ka ni lo a, ka hna nuam ti tak leh ṭha thei ang bera thawk tura rawn kal ka ni a. Chu chu khawvela manager dang zawng zawng hnathawh dan a ni. Chutihrualin point 100 hlawhchhuah chu a ropui a, tun season-ah malsawmna kan dawng a, result ṭha kan neihna tura tha thawhtu zawng zawngin kan damchhungin kan hre reng tawh ang," tiin a sawi.

Manchester City manager zingah tun hmain he chawimawina zinga pakhat pawh hi la dawng an awm lo a, Pep-a hi City manager zinga dawng hmasa ber niin a dawng kawp nghal.