LeBron-a'n Cleveland Cavalier chhan zo lo

Boston Celtics 'home' TD Garden-ah LeBron James-a'n triple double nei mah se Cleveland Cavaliers chak nan a tawk zo chuang lo. Nimin zinga Eastern Conference finals game 2 inkhelah Celtics-in 107-94 in hnehna an chang a, series-ah 2-0 in hma an hruai chiah.

Game 3 hi Quicken Loans Arena-ah May 20, Pathianni hian khelh a ni dawn a, Cavaliers home-ah bawk hian game 4 pawh May 22, Thawhlehni hian khelh a ni dawn. Celtics hian playoff chinah 2-0 a hma an hruai tawh hnuah hnehna an chang ziah a, Cavs tan thawhchhuah a har tawh ang.

Tukin zing dar 6:30 hian Houston Rockets leh Golden State Warriors ten Toyota Center-ah Western Conference finals game 2 an khel dawn a, game 1-ah GSW hian an mikhualna hmunah hian 119-106 in hnehna an chang.

Hei le, LeBron
LeBron James hoin Cavaliers-in bul an ṭan ṭha a, first quarter-ah ringawt hian James hian Cavs point 27 hmuh zinga point 21 chu a lut der tawh. Cavs star hian point 42 a nei a, assists 12 leh rebounds 10 neiin triple double an nei a, tun season playoff china point 40 a neih tlin vawi ngana ni mah se an chak zo lo.

Chutihrualin hei erawh hriat tel a ṭha, James hian first half-ah a nghawngah hliam a tuar a, hemi hnu hian ngai a awh tawh lo. Cavs forward Kevin Love chuan point 22 neiin rebounds 15 a la bawk a, double-double vang hian result erawh a danglam phah lo.

TD Garden neitu Celtics
Celtics-in bul ṭan ṭha tawk lo mah se an talbuai duh lo a, an 'home' TD Garden-ah tlawm an duh lo. Tun season playoff chinah Celtics hian an home-ah game kua khel tawhin hnehna an la chak vek a, an phur chhoh vanglai tak a ni.

Cavs ang lo takin Celtics-ah langsar fal an awm lo a, point 10 hmu tling pawh player paruk awmin Jaylen Brown chuan point 23 a nei a; Terry Rozier (18 pts), Al Horford (15), Marcus Morris (12), Jayson Tatum (11) leh Marcus Smart (11) ten point 10 an hmu tling vek.

Rozier chuan, "Theihtawp chhuahin kan bei zel ang. Kan chakna zat kan ngai pawimawh lo a, chak hrim hrim kan duh," tiin hnehna an chan chu lawmawm a tih thu a sawi a, Horford pawhin, "Kan inring tawn vek a. Hun harsa deuh pawh tawk ṭhin mah ila kan tal chhuak leh mai ṭhin," tiin a sawi.