Hazard-a'n player ṭha a ngen

Eden Hazard chuan Chelsea tan contract thar ziah a hreh lo a, chutihrualin season tharah Premier League nomawi an chawi theih nan nipui laiin player ṭha lakluh a duh thu a sawi chhuak thung.

Kum 27 mi Hazard hian Blues tan 2020 thleng daih contract a nei mek a, tun hnaiah Spanish club lian leh hausa Real Madrid nen sawi zawm a ni fo. London club-in player ṭha an lalut lo a nih chuan an player duh lai hi chan mai thei dinhmunah an ding niin a lang.

Contract thar chungchang zawhna chhangin Hazard chuan, "Season thar atan player thar kan la dawn em tih ka nghak, Premier League champion nih ka duh vangin player ṭha kan mamawh a ni," tiin a sawi.

Season tharah Chelsea hian Champions League an khel phak dawn lo a, hei vang hian French club Lille aṭanga pound maktaduai 32 zeta Chelsea zawmtu Hazard hi a chhuak lo ang tih a sawi theih loh! Mahse, a awm mekna Stamford Bridge-ah a hlim thu erawh a sawi tel thung.

Belgium international Hazard hian season liam ta khan goal 12 khungin assist vawi ruk a nei a, league-ah pangana niin kum 15 chhunga a vawi hnih nan Champions League an khel phak dawn lo a ni.

Manchester United nen FA Cup final an khelh tur thlir nghalin Hazard chuan, "Chelsea kan ni a, season tawpah nomawi chawi kan duh a ni. Ka la champion ngai lohna FA Cup-ah beiseina kan la nei a, he nomawi hi kei leh Chelsea tan season duhawm lo hliahkhuhna a nih theih ka beisei, kan theihna zawng zawng kan hlan ang," tiin a sawi.

Inrinni zan dar 9:45 hian Chelsea leh Manchester United ten Wembley Stadium-ah FA Cup final an khel dawn a, Italian manager Antonio Conte tan Blues a enkawl hnuhnung ber a ni thei tawh hial ang.