Svitolina leh Sharapova an chak

WTA Italian Open champion lai Elina Svitolina-i'n harsatna lian tawk loin third round an inhlangkai a, vawi thum champion tawh Maria Sharapova erawhin Ashleigh Barty paltlang turin set thum a mamawh thung.

Thawhlehni zan inkhelah Svitolina hian world number 35 Petra Martic lakah 6-1, 6-2 in hnehna a chang, kum 23 mi Svitolina hi first round-ah bye tir a ni. Tennis a khelh chhunga clay court-a a hlawhtlinna hmasa berah a vawi hnih nan nomawi a beisei leh mek.

Inkhel dangah world number 1 hlui Sharapova chuan darkar hnih leh a chanve chhungin world number 18 Barty hi 7-5, 3-6, 6-2 in a hneh hram. Italy khawpui Rome-ah Sharapova hian vawi 34 hnehna a channa chiah a ni a, a khingpui Barty erawh a vawi khat inlanna chiah a ni thung.

Russian nula Sharapova chuan, "A hahthlakin a harsa hle, a nihna takah chuan set tinah khan match hran hlir khel ang ka ni. Ka dinhmun thlirin dawhtheih ka mamawh a, tun hma lama ka theihna ang kha ka nei let ve leh mek a ni," tiin a sawi. Sharapova hian a match lehpekah chuan Dominika Cibulkova a hmachhawn leh dawn.

Seeded pangana Jelena Ostapenko pawhin Zhang Shuai chu 6-2, 7-5 in a hneh a, Svetlana Kuznetsova pawhin Polona Hercog 6-2, 6-4 in a ngam bawk. Grand Slam vawi hnih champion tawh Angelique Kerber pawhin harsa takin Zarina Diyas chu 6-2, 7-6(6) in a hneh ve hram bawk.