EPL hmunruak inchuh tur Villa leh Fulham

Championship aṭanga Premier League khel tur team pakhat tan hmun ruak a la awm a, May 26 zan hian Wembley Stadium-ah Aston Villa leh Fulham ten English club inelna sang ber khel tur zawk an chingfel dawn.

Thawhlehni zan khan playoff semifinal second leg khelh a ni a, Aston Villa chuan Middlesbrough lakah 1-0 in hnehna an chang. Playoff inkhel hmasa zawkah Fulham chuan 2-0 in Derby County an hneh tawh bawk.

Goal khat a tawk
First leg-ah Mile Jedi­nak goal khat tauh luh hmangin Aston Villa-in khualmualah 1-0 in hnehna an chang tawh a, Villa Park-ah goal khung belh lo mah se an goal an venhim theih avangin playoff final khel turin an tling.

Middlesbrough lamin goal khung tumin thapui thawh mah se Chelsea captain hlui John Terry hoa khel Villa tlarhnung an paltlang thei lo a, hun tawp hma chiahin Stewart Downing-a'n freekick aṭanga goal bar a tihper tih mai loh chu hlauhawm taka chet an nei thei lo. Tony Pulis-a nau ten season tharah Championship an khelh zui leh phawt a ngai dawn a ni.

Villa an vannei!
Inkhel ṭan hmain car chesual vanga thi Jlloyd Samuel sunna hun hman a ni a, Villa leh Bolton defender hlui Samuel hi Nilaini khan kum 37 mi niin a thi. Mikhual team lamin a tir aṭanga a tawp thlengin thapui thawh mah se Villa keeper Sam Johnstone tan hna hautak an siamsak thei lo.

Villa pawhin defender James Chester-a'n goal hrulah a pet chhuak tih mai loh chu chance ṭha tia sawi tur an nei mumal bik lo. Hun tawp dawnah Boro forward Adama Traore-a ball chip ṭha zet chu box pawnah keeper Johnstone hian a kutin a dang a, referee Mike Dean-a'n yellow card a pe hlauh. Freekick an hmuh chu winger Downing-a'n ṭha zetin chhuih mah se bar a per a, mualneitu Villa vanneih a kaltluang.

Eng nge an sawi?
Aston Villa manager Steve Bruce chuan, "A nihna takah chuan vawi hnih kan inkhelh chhungin target-ah vawi khat chiah an pet thei, hnehna chan phu zawk an awm a nih chuan keimahni kan ni ang. Hun harsa kan tawh laiin kan kiangah fans an awm reng a, an puihna zarah kan tum ram kan thlen theih ka beisei.

"Wembley kan pan hmain inbuatsaihna hun ni 11 kan neih hi ṭha taka hman kan tum ang. Playoff final-ah hnehna kan chang thei a nih chuan a ropui dawn hle a, chutihrualin chak tur chuan kan khelh ṭhat a ngai dawn hle a ni," tiin an hna a awlsam dawn loh thu a sawi.

Middlesbrough manager Tony Pulis chuan, "Theihtawp kan chhuah a, chuti chungin hun ṭha kan insiam tam tawk lo. League match 46 kan khelh hnua pathumna leh palina ten playoff final an khel dawn a, Fulham leh Villa te hi inrelbawlna nei ṭha leh thawkrim tak an nih avangin final khelh hi an phu," a ti.

Villa keeper Johnstone red card pek a nih loh chungchang sawi zuiin Pukis chuan, "Inkhel en ṭhin chuan dan leh hrai an hre vek a, dik takin referee khan thutlukna a siam mai turah ka ngai. Ka hmuh dan dik tak chuan hnawhchhuah tur a ni a, ka ngaihdan ang nei hi a tam zawk an nih ngei pawh pawh ka ring," tiin a sawi.

Fulham an tlang
Thawhṭanni zana playoff inkhel pakhat zawkah Fulham chuan Ryan Sessegnon leh Denis Odoi te goal hmangin an mikhual Derby 2-0 in an hneh a, khualmualah goal awm loa an inhnehtawkpui tawh avangin Sla­visa Jokanovic-a naute an tlang.

Fulham hian league-ah Wolves leh Cardiff City te chiah tluk loh an nei a, Tun hnaiah Fulham hian playoff vawi sarih an khel a, chak ni hmel an hmu ngai lo. Derby lakah hnehna an channa hian inrintawkna a siam dawn a, playoff final-a an hmachhawn tur Aston Villa ai hian point ngain an san zawk bawk avangin an huphurh lo ang.

Fulham boss Slavisa Joka­no­vic chuan, "1975 FA Cup final hnuah Wembley-ah kan lut leh dawn a ni a, a boruak a dang dawn hle. Ka naute an phur em em a, season tluana ṭha taka an khelh tawh ang ngeiin a hmawr pawh kan bawk fuh ngei ka beisei," tiin a sawi.

Derby manager Gary Ro­wett chuan, "Ka nauten an theihna zawng zawng sengin Fulham an hmachhawn, a hmawr kan bawk thei tlat lo kha a mak a ni. Football-ah chuan ṭha taka khel chung pawha chak lo zawk nih a ngaih chang a awm miau si," tiin a sawi.