LMA Awards-ah Chennaiyin coach chawimawi

Indian Super League khelh zawh taka Chennaiyin FC champion puitu coach John Gregory chu League Managers' Association (LMA) Awards sem zanah LMA Special Achievement Award chawimawina pek a ni a, he chawimawina hi ISL-a English coach champion hmasa ber a nih avanga pek a ni.

Premier League, English Football League (EFL) leh English football team-a national manager intelkhawm pawl League Managers' Association awards sem zanah hian football khawvela hming langsar tak tak an inlan a, Gregory hian Manchester United leh Everton manager hlui David Moyes hnen aṭangin chawimawina hi a dawng.

LMA chairman Howard Wilkin­son chuan, "John Gregory hian Indian Super League-a English coach no­mawi chawi hmasa ber a nih avangin LMA Special Achievement Award hi a dawng a ni," a ti a, Chennaiyin FC nena an champion zinkawng video tawi tihchhuah a ni bawk.

Aston Villa manager hlui Gre­gory chuan, "India-a ka season hma­sa bera nomawi ka chawi thei hi ka lawm takzet. India ramah football a ṭhang nasa a, ISL phei chu season tinin a ṭhang zel a ni. India a kir a, nomawi humhim ka chak tawh a ni," a ti.

Kum 64 mi manager hian ISL-a Chennai club a champion pui hnuah khan contract thar a ziak a, champion nomawi an chawina kawngah khan Jeje Lalpekhlua leh Jerry Lalrinzuala chu player pawimawh an ni.