Dam chhung atan Al Mirdasi hrem

World Cup referee tur zinga mi Fahad Al Mirdasi chu Russia a pan nan ni ruk chauh a awm tawh tihah match fixing vangin damchhung atan hrem a ni!

Saudi Arabian Football Federation (SAFF) chuan thuchhuah siamin, "Al Mirdasi hian Al Ittihad leh Al Faisaly ten King's Cup final an khelh hmain match fixing a tih theih thu Al Ittihad a hrilh a, amah zawk hian a sawm a ni," an ti a, Al Mirdasi hi police hmaah a inpuang a ni.

Kum 32 mi referee hian Al Ittihad chief Hamad Al-Senaie chu whatsApp hmangin a bia a, Hamad hian rang takin a message dawn hi SAFF hnenah a thawn chhawng a, Mirdasi hi hrem a nih phah.

Confederations Cup 2017-a referee ni tawh chungchanga SAFF thu chhuak hi football thuneitu sang ber FIFA chuan a hre tawh a, thuchiang zawk an ngaihchan thu an sawi.

Kum 32 mi Al Mirdasi manchhuah a nih takah chuan Premier League referee ṭhin Mark Clattenburg, February 2017-a Saudi Arabia head of referee ni tura Arab ram pantu chuan King's Cup final hi a enkawl a, Al Ittihad hian extra time hnuah 3-1 in hnehna an chang.