Pep-a chungah Silva a lawm

Manchester City midfielder David Silva chuan, a fapa enkawl chungchanga hun harsa tak an tawh laia a mah hrethiamtu Pep Guardiola leh damdawi in hna thawk ho chungah a lawm thu a sawi.

Kum 32 mi Silva hian nikum December thla khan fapa Mateo a nei a, a fa hi a hun hma a piang a nih avangin damdawi inah dah char char a ni a–Thawhlehni khan damdawi in an chhuah san ve chiah. Silva chuan, "A tawpah chuan kan haw ve ta. Thla nga rei tak a ni," tiin a sawi.

Spain international Silva hian a fapa kianga hun hman a duh fo avangin nikum krismas hnuah Premier League match riat ngawt a khel lo a, Thawhṭannia champion lawmna kawngzawh an neih ṭum pawhin a inlan ve thei lo a ni.

Lawmthu sawiin Silva chuan, "Fans chungah ka lawm, ka ṭhiante, coaching staff mai bakah a bik takin ka dinhmun min hriatthiam saktu kan coach chungah ka lawm takzet a ni," a ti a, Pep chu mihring ṭha chungchuang tak a nih thu a sawi bawk.

Manchester City manager Guardiola hian January thla khan, "David hi a duh hun huna a zin leh haw phal sak a ni. Hringnunah chuan chhungkua aia pawimawh a awm thei lo," tiin zalenna zau tak a lo pe tawh a ni.