Buaina karah England chak zo lo

England chuan Thawhlehni zan khan World Cup qualifier-ah Hungary an mikhual a, hnehna chang ngei tura ngaih ni mah se 1-1 in an inhnehtawk.

Wembley Stadium-a inkhelah England player-ten ṭhingṭhi chunga chi inthliarna an duh lohna an lantir avangin Hungary fan-ten buaina an siam a, inkhel tibuai khawp erawh a ni lo.

Hungary tan Roland Sallai chuan penalty hmangin goal hmahruai a khung a, Three Lions tan John Stones chuan si phurh hi sut mah se goal dang erawh an khung thei tawh bik lo a, point khatah lungawi an zir.

England-in hnehna chang se an hmabak match hnihah Qatar pan turin point hnih bak mamawh lo tur an ni a, mahse, an chak zawh loh miau avangin point li an la mamawh phah - an hmachhawn leh tur team erawh Albania leh San Marino an ni a, harsa lo tura ngaih a ni.

Beisei loh Hungary
Inkhel ṭan hmain England player-ten chi rawng inthliarna an duh lo tih lantirin an ṭhingṭhi a, Hungary fan-ten banner keng chungin an lo au el a, buaina a chhuak - mikhual team an langsar hmasa phawt!

Mikhual tlangnel Hungary an inthlahrung lo laklawh a, minute 24-na lekah goal hmahruai an rawn khung zui. Luke Shaw-a'n Loic Nego nena ball an inchuhna lamah a khai sang hret a, penalty a chawi.

Roland Sallai-a'n harsatna nei loin penalty hi goal-ah a chantir a, goalkeeper Jordan Pickford rin loh lamah a pet. Wembley-a England fans an ngawi a, Hungary fans 1000 vel an sapatal thung.

Mahse, England an beidawng lo. Phil Foden-a freekick aṭanga ball kal chu John Stones chuan si phurh sutna goal ni turin a khung a, mahse, fans beisei angin Three Lions-in goal dang an khung tawh lo.

Beisei phak lo
England-in kar hmasa khan Andorra chu 5-0 in an sawp a, Gareth Southgate-a'n Hungary nena an inkhel tur thlirlawkin a player neih ṭhatte bench-ah a dah a, an ṭhat dan berin an khel lo.

Hungary lakah goal khung tam an tum tih pholangin Southgate-a'n 4-3-3 formation a rawn hmang a, holding midfielder pahnih hmang ṭhin khan pakhat chiah a rawn hmang a, Declan Rice a lut a, bench-ah Jordan Henderson a awm.

Rice-a bulah Foden leh Mason Mount an ding a, tlarhmaah Raheem Sterling, Harry Kane leh Jack Grealish an inkawp. Mahse, fans beisei angin England-in goal an nawr lo a, Mount a reh a, Sterling leh Kane ten beisei an phak lo bawk.

Foden a khel pangngai a, Grealish lah minute 62-naah Bukayo Saka chuan minute 62-naah a thlak. England-in goal nawr nuam ti player an luh hnemtir avangin an goal nawr a nat phah sawt lo a, an tlarhnung a pawp thung - Hungary thiam deuh se chak lo thei an ni.

Kane a reh
England captain Kane-a theihna sanzia inhrilh nawn a ngai lo a, mahse, kum 28 mi striker hi tun season-ah a la 'form' tlat lo a, Tottenham Hotspur leh England tan chuan manganpui tham a ni tawh.

Ram tan match 65 leka goal 41 khung thei striker hian nipui transfer lai khan Tottenham Hotspur chhuahsan a dil a, Manchester City zawm a duh. Mahse, Spurs-in an chhuah phal lo a, tui lo takin London club-ah a cham chhunzawm.

Nipui transfer boruakin Kane a nghawng tih hai rual a ni lo a, Premier League match ruk a khelh tawhah goal a la khung lo a, international break-ah goal a khung loh chhunzawm - September 2017 hnua England tana qualifier match-a goal a khung loh hmasak ber a ni.

Kane khelh chhiatzia tilang chiangtu pakhat chu goal khung an mamawh vanglai, minute 76-naa Tammy Abraham-a'n a rawn thlak kha a ni a, English striker a 'form' leh a ngai.

Hungary fan-te leh buaina
England player-te inkhelh hmain ṭhingṭhi chungin vun rawng inthliarna duh lohna lantir nan an ṭhingṭhi a, chi inthliarna lama hmingchhe ve tak Hungary fan-ten hei hi hrethiam loin an lo au el.

Buaina chinfel tumin Police-ten Hungary fans awmna lam an pan a, buaina a chhuak zui. Metropolitan Police chuan thuchhuah siamin, "Fans ṭhenkhatin chi inthliarna lam hawi ṭawngkam duhawm lo takin steward pakhat chu an ṭawngkhum a, kan officer-ten an tih tur tia fans ṭhenkhat an man hnuah buaina tenau a chhuak zui a ni," an ti.

Khawthlang media-ten an tarlan dan chuan Hungary fan-te hi steward-te nen an intibuai a, Police-ten fan-te buaina ṭhelh tumin an vua a, fans lam pawh hian venhimna kengkawhtu lam hi an bei let ve a ni.
Hungary-in rin loh taka hma an hruai khan Hungarian fan-te chuan stadium-ah phal loh halmawite halin an goal khung an lawm bawk!

Football Association chuan Wembley Stadium-a thil thleng duhawm lo hi an chhui zui tur thu an sawi a, an thil hmuhte chu football khawvela thuneitu sang ber FIFA hnenah an thlen leh ang. Budapest khawpuia ram pahnih intawn hmasakah pawh khan buaina a lo chhuak tawh a, Hungarian Football Federation chu £158,400 (nuai 162.59) chawi tur leh match hnih chu entu awm loa khel tura hrem an lo ni tawh.