Hattrick siam hnem ber Ronaldo

Cristiano Ronaldo chu ram inelna bika hattrick siam hnem ber a ni ta. Portugal captain hian Luxembourg lakah goal thum khungin an ram hi 5-0 in hnehna a chanpui a, international match-ah hattrick vawi 10 a siam tlinna a ni nghal.

Ronaldo hian minute riat leh 13-naah penalty aṭangin goal a khung a, hun tawp dawn minute 87-ah a goal thumna a tauh lut bawk. Portugal tan hian Bruno Fernandes leh Joao Palhinha ten goal khat ve ve an khung ve bawk.

Hattrick siam thiam
Thawhlehni zan Estadio Algarve-a inkhelah Manchester City player Bernardo Silva-a penalty hlawhchhuah chu Ronaldo tan khung turin harsatna a awm lo, replay en nawn a nih hnuah erawh Silva hi box pawn aṭanga tlu lut niin a lang.

Goal hmasa luh aṭanga minute nga a nih hnuah goalkeeper Anthony Moris chuan Ronaldo titluin penalty a chawi zui a, a khungtu chu a ngai Ronaldo bawk a ni; hma taka goal hnih an neih avangin Portugal hi nuamsa takin an chak thei.

Manchester United forward hian ball kang a hmuh chu a ke a lo la perin, tawih zetin a volley zui - mahse keeper Moris-a'n a lo dansak hlauh, hun tawp dawna hnai tak aṭanga a tauh erawh a dang thei lo; ram leh club tan vawi 58 zet hattrick a siam ta.

Portugal dinhmun
World Cup qualifier group A-ah Portugal hian point 16 hmuin pahnihna an ni mek, anmahni aia match khata khel hnem zawk Serbia chu point khatin an phak lo - group hmahruaitu an tlang dawn a, pahnihna tan playoff khelh a ngai ang.

Ronaldo te ram hian November thlaah Republic of Ireland an zin chilh dawn a, chumi hnuah Serbia an mikhual zui leh ang. Serbia hian Dusan Vlahovic-a goal hnih leh Dusan Tadic-a goal hmangin Azerbaijan 3-1 in an lo hneh ve bawk, khelh hmabak pakhat chiah an nei tawh thung.

Portugal manager Fernando Santos chuan, "Kan thil tum hmasa chu hnehna chan a ni, kan tihlawhtling phawt. Khelh hmabak pahnih kan la neihah hian tun aia ṭha zawk hian khelh leh kan tum ang," tiin a sawi a, playoff khelh ngai loa tlin ngei a tum.