Fury laka tlawm Wilder a chawl dawn lo

American boxer Deontay Wilder-a trainer Malik Scott chuan a boxer chu Tyson Fury lakah a vawi hnih nan tlawm mah se a chawlh loh tur thu a sawi a, kum 35 mi boxer hi ring chhungah kan la hmuh chhunzawm zel dawn niin a lang.

Scott chuan, "Deon-tay hian sum leh pai chungchangah ngaihtuah-awm lohin a chhungte dinhmun a siam tawh a, sum siam tura inhnek chhunzawm kher a mamawh lo. Chutihrual chuan chawlh lam a la ngaihtuah lo a, hemi chungchang hi chu a sawi pawh kan la sawi lo," a ti a, a boxer chuan boxing nuam a tih avangin chawlh a la ngaihtuah lo niin a sawi.

Pathianni khan Las Vegas khawpuiah Fury chuan Wilder hi round 11-naah a knockout a, vawi thum an inhnekah vawi hnih a chakna niin vawi khat an inhnehtawk.

February 2020-a Fury a chak hmasak khan technical knockout hmangin British boxer hi chak zawkah puan a ni a, hetihlaia Wilder-a coach Mark Breland chuan round sarihnaah towel a theh lut a, Wilder-a thinrimin Breland hi ban zuiin Scott hi a trainer thar atan a ruai.

Scott chuan, "Deontay hi ka hrechiang a, ani ang knockout artist tan chuan towel thehluh chu tawrh dam theih a nih loh thu a sawi fo ṭhin. Deontay leh Mark hi gym pawn lamah an titi dun mang lo a, phone hmang pawhin minute nga aia tam an inbe ngai lo.

"Kei leh Deontay erawh kan intibuai ve ngai lo ang - chutianga intibuai tur chuan kan inkawmngeih mah mah a ni," a ti.

Kum 35 mi Wilder hian vawi 45 fight a hmachhawnah vawi 42 hnehna a chang a, vawi hnih tlawmin vawi khat draw a nei a, heng zinga vawi 41-ah hian a khingpui a knockout!

Scott chuan, "Deontay hi a duh hunah chuan a lo kir mai ang. Fighter ropui a ni a, level sang taka awm a nih avangin fight ropuiah lo chuan inlan chi a ni lo," a ti.

Wilder-a trainer chuan a boxer leh a hneh loh tak Fury fak zuiin, "Deontay Wilder khan a khel ṭha takzet a, mahse, Tyson Fury khan a khel ṭha lehzual a ni mai. Heavyweight division boxing tan chuan anni pahnih intawng kha zan chhinchhiahtlak a ni.

"A tluk hnu pawha tho leh zel thei Fury khan fak a phu a, legend a ni. Heavyweight boxing chanchina boxer ṭha ber pawl a ni a, Deontay pawh chutiang tho chu a ni," a ti a, a boxer hming a lam hmaih lo.