T20 Cricket World Cup ; India aiawha khel turte IPL-ah an che ṭha em?

ICC Men's T20 World Cup chu October 17 - November 14, 2021 chhung hian khelh a ni dawn a, Virat Kohli hoa khel tur India chu champion rinkai zinga mi an ni ang.

Kum 2007 khan T20 World Cup hi khelh ṭan a ni a, final-ah India-in Pakistan hnehin champion hmasa ber an ni. Inelna hi ṭum ruk khelh a ni tawh chungin Men in Blue hi an la champion nawn leh lo a, chutihrualin kum 2014 khan final an thleng a, Sri Lanka an hneh lo.

Beiseina thar
T20 World Cup hnuhnung ber kum 2016-a neih kha India-in a thleng a, semifinal-ah champion zui ta West Indies an hneh lo. Tun ṭumah hian nomawi chawi ngei tumin kum 2011 World Cup (ODI) a champion puitu captain Mahendra Singh Dhoni chu mentor atan an ruat.

MS Dhoni hi kum 40 mi ni tawh mah se player tur pawhin a la ṭha tawk tih chu IPL vawi 14-naah a hriat. India captain hlui hian CSK hi final a thlenpui a, qualifier 1-a Delhi Capitals an hneh ṭumin over tawp berah ṭum thum four a vua. T20 World Cup-ah pawh Dhoni tawnhriat hi a pawimawh ang.

Captain Kohli
Khawvel player ṭha ber zinga mi Virat Kohli hian T20 World Cup zawhah T20 bika India captain hna a chawlhsan tur thu a sawi a, chuvangin tun hi a captain-na hnuaia Men in Blue champion puina hun ṭha a ni.

Amaherawhchu IPL lamah Kohli hian a club khelhna Royal Challengers Bangalore chu vawi khatmah a champion pui lo. IPL 14-ah pawh eliminator thlenpui mah se Kolkata Knight Riders an hneh lo. Kohli hian kum 2017 aṭangin T20 captain hna hi a chelh tawh a, hun pawimawhah an chetsual leh ṭhin avangin nomawi lian tham an la chawi lo.

Kumin khan Test Championship final hmasa berah New Zealand an hneh lo a, pahnihnaah an lungawi a ṭul. ODI lamah pawh a tawp an khar ṭha chuang lo. 2019 Cricket World Cup-ah khan India-in semifinal-ah New Zelaand an hneh lo a, 2015 Cricket World Cup-ah semifinal-ah bawk Australia an hneh lo.

IPL neih zawh takah pawh Kohli hian run siam tam kawngah Indian player pariat ngawt a tluk lo. Mahse Kohli a ni miau a, India aiawha khel tur thlannaah chuan thlan hmasak ber tur a ni lawi si.

Batsman an ṭha
Tun hma aṭangin India-in batsman an nei ṭha ṭhin a, tun ṭumah pawh selector tan chuan batsman thlan thiam hi a har dawn. IPL aṭanga teh phei chuan an thlang sual emaw tih hial tur zawk a ni.

India squad-ah hian run siam tam ber dawttu Ruturaj Gaikwad (Chennai Super Kings) leh pathumna Shikhar Dhawan (Delhi Capitals) te koh an ni lo a; Rajasthan Royals batsman Sanju Samson leh Punjab Kings batsman Mayank Agarwal pawh parukna leh pariatna ni pha mah se an tel pha chuang lo.

Chutihrualin an kohte pawh koh awm tak vek chu an ni. Kohli dawta hming langsar ber Rohit Sharma a ni a, Mumbai Indians batsman hian IPL 14-ah 381 runs siamin run siam tam lamah 13-na ni pha chauh mah se pressure sangah ani tluk pha tur an awm lo.

KL Rahul-a'n IPL match 13 aṭangin 626 runs a siam a, run siam tam ber a nih avangin a tel ngei a ṭul. Mumbai Indians batsman Suryakumar Yadav erawhin 317 runs a siam a, ram tana T20 match li chauh la khel Suryakumar hi thlak châkawm pawl tak a ni ngei ang.

Wicketkeeper pahnih Rishabh Pant leh Ishan Kishan te hian hmun pawimawh an chang thei dawn a, bul ṭan tur zawka ngaih Pant hian IPL-ah 413 runs a siam a, run siam tam zingah pakuana a ni pha. Wicket keeper pawh ni lo se, Pant hi a bat thiamna vang ringawt pawhin thlan a phu. Ishan Kishan erawh Pant a thachhang dawltu tur a ni a, tun dinhmunah chuan a awm ber a ni.

Rajasthan Royals opener Samson hi wicket keeping lamah hmasawnna tur a ngah - ho te tea ball thlauh leh ball a chhuah avanga an khingpuiten run an siam phah a tam, batting-ah ṭha viau mah se opener-ah amah aia awhawm an tam bawk. Pant erawh middle order a ni miau a, chutihrualin cricket ngainatuten Samson hi Ishan Kishan aiin squad-ah awm zawk se an ti a nih pawhin a mak lo ang.

Hardik Pandya leh Ravindra Jadeja te hian bowling leh batting-ah theihna sang tak an nei a, India chakna hnar tur an ni thei ang. Ravindra Jadeja hi tun dinhmuna all rounder ṭha ber zinga mi a ni a, IPL-ah 227 runs a siam bakah wicket 11 a la. ICC all rounder ranking-ah Jadeja aiin Pandya hi a sang zawk.

Beiseina siamtu Bowler
India hian tun hma zawng aiin bowler an nei ṭha. Khawvel bowler ṭha ber zinga mi Jasprit Bumrah an kawl a, ani hian IPL-ah khan wicket 21 lain tluk loh pahnih chauh a nei. Mak ang reng tak erawh a tluk loh pahnih, wicket 32 leh 23 la thei pahnih Harshal Patel leh Avesh Khan te squad-ah an awm pha lo. Avesh Khan erawh a chet ṭhat rah a seng a, net bowler atan an ko leh hnuhnawh.

Bhuvneshwar Kumar leh Mohammad Shami ten Bumrah an thlawp dawn. Shami hian wicket 19 lain IPL-ah wicket la tam pathumna a ni pha a, Bhuvneshwar erawhin wicket ruk chiah a la. Chutihrualin bowler dang Varun Chakaravarthy (16), Axar Patel (15) leh Rahul Chahar (13) ten wicket 10 an la tling vek. Ravichandran Ashwin erawhin wicket nga chauh la mah se a theihna thlirin hmaih phal chi a ni lo.

India-in World Cup ṭan hmain Australia (October 18 leh 20) nen ṭum hnih friendly match an khel dawn a, an match hmasa berah hmelma Pakistan an hmachawn nghal dawn. Men in Blue inlan hun hi October 24 a ni dawn a, an khingpui hi Pakistan a nih dawn avangin chak ngei ngei a ṭul ang.

India Squad
Virat Kohli (c), Rohit Sharma, KL Rahul, Suryakumar Yadav, Rishabh Pant (wk), Ishan Kishan (wk), Hardik Pandya, Ravindra Jadeja, Rahul Chahar, Ravichandran Ashwin, Axar Patel, Varun Chakaravarthy Jasprit Bumrah, Bhuvneshwar Kumar, Mohammad Shami

Reserves: Shreyas Iyer, Deepak Chahar, Shardul Thakur; Mentor: MS Dhoni