Zverev lakah Murray a tlawm

Andy Murray chu Alexander Zverev hneh loin Indian Wells Masters third round-ah a tla a, a chak loh hnuah thla leha khelh tur Davis Cup Finals chu khelh theih a inrin loh thu a sawi nghal bawk.

Nimin zing inkhelah kum 34 mi Murray hi 6-4, 7-6 (7-4) in a chak lo, tun tournament hi khel ṭha viau mah se Zverev laka dingchang tur chuan a khel ṭha tawk lo a, puanthuah telin an ram lam a pan a ngai.

Grand Slam vawi thum champion tawh Murray chuan, "Tun dinhmunah chuan Davis Cup khelh tumna ka nei lo, ka dinhmun leh tunlai ka khelh dan thlir hian ram aiawh tlakah ka inngai lo," tiin player naupang leh ṭha zawkte tan hmun ken a tum.

Murray a chak lo hi Zverev tan erawh chanchin ṭha a ni. German tlangval chuan, "Big Four zingah chuan Andy chauh hi ka la hneh loh a ni a, tunah chuan ka hneh ta, ka thil tum zinga pakhat ka hlenchhuah avangin ka lawm," a ti.

Inkhel dangah Stefanos Tsitsipas chuan set hmasa a hloh zet hnuah Fabio Fognini chu 2-6, 6-3, 6-4 in a hneh let a, a match lehpekah chuan Australian tlangval Alex de Minaur a hmachhawn leh ang.

American player Taylor Fritz-a'n amah aia rinkai leh ranking sang zawk, seeded pangana Matteo Berrettini chu 6-4, 6-3 in a hneh ve bawk a, quarterfinal-ah chuan Nikoloz Basilashvili leh Karen Khachanov inkhela chak zawk a hmachhawn leh dawn.